Myanmar (Hakha Post) – Philippines ram Manila khualipi ah tuah cuahmah mi lengdawh zuamnak Miss Earth 2017 ah Chin nu Van Sui Par @ Tin Sandar Myo cu Myanmar ram ai-awh in lengdawh aa zuam lio a si, November 4 ah an dih te lai, tiah October 27 ah thawng kan theih.

“Zuamnak lawng si loin lentecelhnak, timhtuahnak, exercise le lenvah tibantuk an kan tuahpi peng i kan tha a baa ngaingai. Zuamnak hi a tlangpi cun aa lim pah cang ko. Final cu November 4, Mall of Asia ah tuah a si te lai. Kan mark kan i hngalh cio hna lo tik ah teinak ka hmu lai, ka hmu lai lo ti hi a chim awk a har ngaingai. Zeiti a si hmanh ah nihin tiang thazaang a ka petu ka miphun hawi nan dihlak cung ah kaa lawm tuk. Thazaang ka pe peng rih ko u, tiah kan nawl hna,” tiah Van Sui Par @ Vanvan nih The Hakha Post ah a chim.

Tutan Miss Earth 2017 zuamnak ah vawlei cung ram 90 in Model 100 hrawng an i zuam kho. Miss Earth lengdawh zuamnak cu UN tang ah a um mi Pawngkam Zohkhenhnak Phu (Environment Project) nih an tuah mi a si.

“Hi zuamnak ah hin dot 5 in rikhiahnak an tuah. Lenglei dawhnak asiloah kan tungtai hi zatuak 20% (Figure and Form), Nuhrin dawhnak hi 35% (Beauty), Cawlcangh le umtu-hoiher ah 10% (Performance and Poise), Thluak that 30% (Intelligence), le Lungput 5% (Attitude) tiin an zoh i, mark zeizatdah kan hmuh cang i, zei dirhmun dah kan phanh cang ti kha hngalh khawh a si rih lo. Thlacamnak in ka bawm rih ko u,” tiah a chimchap.

Van Sui Par @ Vanvan cu Miss Earth Myanmar 2017 ah teitu a si i, Myanmar ram ai-awh in  Philippines ah atu bantuk in a kal hi a si. Amah hi Miss Myanmar World, Model Academy zuamnak zong teitu dirhmun in Chinmi mithmai a hngaltertu Model pakhat a si.

LEAVE A REPLY

Please enter your comment!
Please enter your name here