Hakha (Hakha Post) – Hakha Pyidawtha Market cu October 18 in theh hram an thawk cang, min thar sak in a ralai mi 2018 March thla ah an dih lai tiah tuanvo ngeitu sin in thawng kan theih.

“October 18 in theh hram kan thawk cang. 2018 March thla hrimhrim ah a sak lim a hau. Hi market hi Sipin Market asiloah Pyidawtha Market tiin kan auh chung ko nain a thar kan sak hin cun, min thar kan sak lai. Kan pale philhlonak min pakhat khat kan sak lai. Cucu, Chin Ramkulh Cozah le Hluttaw, Khuanu Khuapa lungtlinnak in kan sak lai ca ah minsak ding kong ah mizeipoh nih ruahnak pek khawh kan si,” tiah Chin Ramkulh Sipin Lutlai Pu Thla Hre nih The Hakha Post ah a chim.

“Hi Market saknak ca ah Pyidaungsu in budget sing thongruk a tla nain kanmah nih sing zahnih le cheu kan kawlchap lai i, sing zariat le cheu dih in kan sak lai. Atu i dawrkhaan ngei mi minung 72 cu man fawite le papek in kan ruahpiak hna lai. Cun, a khaan dangte zuar ding hi khaan 37 a si i, mizeipoh nih sok khawh a si. A man zong voi khat lopi ah pekcolh theng a herh lai lo, duhsah in pek khawh a si lai,” tiah a cunglei upa nih a chimchap.

Hakha Pyidawtha Market thar sak ding cu Design Excel Co.Ltd., nih tuanvo laak in a sak mi a si i, tangka sing thong riat le cheu dih in 2018 kum March thla chung ah lim ding in a sak lai. Caankarlak thil zuarnak cu Kio Mang ceertual ah zuar a si lai, tiah thawng kan theih.

LEAVE A REPLY

Please enter your comment!
Please enter your name here