Falam (Hakha Post) – Falam peng Dokthek khuami Pu Huat Chum cu Pathian thawngtha chim ding in khual a tlawn hnu thla ruk leeng tiang inn a hlam ti lo ca ah khuami nih an kawl. Pu Huat Chum (Far Cang pa) cu kum 80 hrawng tar a si.

Thawngtha a chimnak kum 50 hrawng a si cang i Chin ramkulh Chaklei, Kalay peng hrawng tiang a tlawng tawn mi a si. A luan cia thla ruk hrawng khan evangelist kal kaa thawh than lai a ti i khua in a chuak. Pathian bia aa hruhpi mi a si i a holh a fiang tuk lo mi a si. A hna zong a chet. Amah lawng a hmei mi a si tiah khua upa nih an chim.

“Hlan ah cun voi khat khual a tlawn ah thla hnih thum a rau tawn ko. Atu cu a tar ve cang i zarh khat hnih ah cun khua a rak phan than lengmang ko. Kan hnu July 29 ah khan Tlangkhua a phan i Tlangkhua nih Aibuk khua ah an thlah. Cu hnu cun a thawng kan thei ti lo. Kan hnu zarh ah khan Tikhuangtum khuami pakhat nih Hakha sii-inn lam ah ka hmuh a ti ca ah hlathlai ding in kan ratnak a si,” tiah Dokthek Baptist Khrihfabu Church Chairman Pu Ceih Bik nih The Hakha Post ah a chim.

Kum khat chung te ah a nupi le a fale pathum an rak thi i cu hnu cun atu bantuk in thawngtha chim khual tlawn aa thawknak a si tiah Pu Huat Chum kawl ah Hakha a phan mi Dokthek khua upa hna nih an chim. Tutan a tlawnnak in khua a hlam ti lo ca ah khuami an lungre a thei i a tlunkal tawnnak khua pawl ah phone in hlathlainak an tuah pin ah internet zong in thawngthanhnak an tuah.

A hmutu nih Phone 09- 449818186, 09-456350102 le 09-426420849 ah pehtlaih ding in khua upa hna nih thawngthanh an duh mi a si.

LEAVE A REPLY

Please enter your comment!
Please enter your name here