Kalaymyo (Hakha Post) – Kalay Kabaw Chin Funtomnak Bu hruainak in A Voi Thumnak Chin Tho Puai cu October 16-20 tiang Kalaymyo peng Tanphu khua ah an tuah lio pi a si.

“Chin Tho puai a hmangtu khualtlung min laak khawh mi minung 820 leng an si. Cu khualtlung pawl cu inn ngeitu Tanphu khua um Laimi nih an don hna,” tiah CFB Branch Secretary Pu Thang He nih The Hakha Post ah a chim. Khuallian sawm mi hna ah Chin Ramkulh Cozah Chief Minister Pu Salai Lian Luai, USA um Pu Tial Khar Lian (CYO President), Pu Khua Uk Lian (CNF), Pu Soloman Thang Ding (CNF), Pu Bawi Lian Mang le TABC. GS Rev. Dr. Za That zong an rak tlung.

Hlasatu ah Hakha in Nu Hlawn Sung zong sawm a si. Lentecelh zuamnak phuntling, leengdawh samthlairem zuamnak, kan Lai paih zuamnak le hlasak zuamnak zong tuah a si. Hi Chin Tho tuahnak ca ah tangka sing 70 dih ding in suaisam a si.

Hi Chin Tho puai hi, kum 2012 Kyarinn khua ah thawk a si i a voi 2nak cu 2013, Khampat ah rak tuah a si. Tilian harton ruang ah kan i din i a voi 3nak Tanphu khua ah kan hun pehzulh hi a si, tiin CFB Upa pakhat a si mi Pa Kulh sin in kan theih.

LEAVE A REPLY

Please enter your comment!
Please enter your name here