HAKHA (Hakha Post) –  Hakha Peng Meithat Zung hruainak in Hakha khuachung um khual riahbuk zohfelnak cu October 13 in an thawk cang, tiah thawng kan theih.

Hakha Peng Meithat Zung nih Hakha khua ah a um mi khual riahbuk zohfelnak an tuah mi cu riahnak khan zeizatdah a um, innka le thlalangawng a bi tuk maw asiloah a kau tuk maw, inn cung le tang tumkainak hlei a bi tuk maw, a kau tuk maw, Asiloah minung umkal nakding ah siarem a si maw ti hna an si. Cun, a biapi in thil poipang a um caan ah rianrang chuahnak (Emergency Exist) a um maw, mei lei kam ah zeitluk in dah a hlankan in ralrinnak (Fire Safety) an ngeih, cun, chun he zaan he riahbuk rungvengtu an i chiah maw ti hna an si.

“Khuapi pakhat a si ve cang i ramchung ramleng in khualtlung an tam cang ca ah an riahnak riahbuk kha an ca ah sia a rem lo mi le, a humhim mi a si lo ahcun riahbuk lawng si lo in Hakha min zong a chia ding a si. Cucaah, remh ding a herh mi kan remhter hna i zohfelnak kan tuah than te lai,” tiah Hakha Peng Meithat Zung Lutlai Pu Ca Zung Mang nih The Hakha Post ah a chim.

October 13 thawk in zohfelnak thawk a si cang i ni khat hnu ni khat in riahbuk kip zohfel dih a si lai. Central Guest House cu zohfelnak tuah dih a si cang. “Hakha khual riahbuk hna hi inn an rak sak lio ah khual riahnak ca ah siloin chungkhar umnak ca ah sok in rak sak an si. Asinain, a hnu deuh ah khual riahbuk ah an thlen ca ah khual riahbuk sining a tlinh lo mi an tam tuk ca ah caan kan pek deuh hna i zohfelnak kan tuah than tik ah kan i reng deuh te lai,” tiah Pu Ca Zung Mang nih a chimchap.

Hakha Peng Meithat Zung nih a liamcia zarh chung zong ah Hakha khua petrol zuarnak dawr pawl zohfelnak an tuah cang i tutan hi khual riahbuk hna zohfelnak tuah an thawk than hi a si.

LEAVE A REPLY

Please enter your comment!
Please enter your name here