CHIN (Hakha Post) – 2017 September 11, Tlanglo khuataw Lahva ah a rak paam mi CNA ralkap Mana Phwe ruak cu October 5 zaanlei ah tiva riah ding in a kal mi Dawn khuami nih an hmuh tiah thawng kan theih. Ruak an hmuhnak hmun cu Dawn khuataw Tio tiva Thaichawn tili ah a si i ti nih a fenhnak hmun in, tiva hrawn in ni khat lamkal tluk hrawng aa hlaatnak hmun a si.

Dawn khua in meng ruk aa hlaatnak hmun ah a si i a ruak cu Dawn khuami hna nih October 6 ah an vui. “Khuami nih ruak kan hmuh ti in CNA camp ah thawng kan thanh hna i CNA in tuanvo ngeitu pathum an rak phan. Aa hruk mi angki, kedan le a tung niamsan zoh tikah CNA ralkap Mana Phwe a si ko ti in an fehter. Ram le miphun ca ah rian a tuan mi pakhat a si i kan khua ah kan vui ko lai tiah kan hal hna. CNA lei nih an kan cohlan ca ah khuami nih khua thlaanhmun ah a ruak kan vui,” tiah Dawn Khuabawi Pu Roland nih The Hakha Post ah a chim.

R u a k hmuh ning kong he pehtlai in, tiva riah ah a kal mi pawl nih an hmuh i phone signal a umnak hmun in khua an kan chawnh. Nan khuami ti nih a fenh mi an um maw, thawngpang tah nan thei maw, tiah kiangkap khua kip kan hal hna i an um lo an kan ti. CNA ralkap ti nih a fenh mi kha a si kho men ti in kan ruah ca ah aa hruk mi angki, kedan le a niamsan he CNA thawng kan hei thanh hna ti zong a chim. CNA ralkap Mana Phwe cu Kanpalet peng mi a si i kum kul hrawng a si.

2017 September 11 ah Tlanglo khuataw Lahva ah a rak paam mi a si. A paam ni thawk in Tio kap um khuate pawl nih an kawl lengmang nain an hmu kho lo i nihin ceo ah a ruak an hmuh hi a si.

LEAVE A REPLY

Please enter your comment!
Please enter your name here