Australia aum nak Local Cozah rianttuan dingin ai timhlamh nak kong amah pumpak a facebook ah a ttialmi kan rak tar. Kan in lawmhpi i thazaang kan in pek Bawipa nih nai timh mi twin ter ko sehlaw kan Miphun khi ka ah aum mi hna zongnih thazaang rak pe cio hna usih law Vote thal awk a that cun rak thla cio hna usih.

Ka dawtmi ka miphun hawile hna,
Australia ram Local Government thimnak (election) ah ka lut ve i, tuthla dih ahhin thimnak tuah asi cang lai.
Tutan ka luhnak hi ka fimthiam caah le ka thilti khawh caah asilo. Mipem ralzam asimi hna nih, Cozah lutlai pawl hnuzul si peng loin kanmah hrimhrim hi luntlai ah kan dir kho ve, uktu kan si kho ve, thimnak ah luhnak nawl kan ngeih ve timi hmuhsaknak caah ka luh asi. Cun, Bawipa Pathian a hnatlak le ka miphun hawi hna nih nan thlacamnak he nan ka dirhkamh ahcun teinak ka kut cungah a um ko ti ruahchannak ka ngei fawn. Tutan hi teinak ka hmuhlo hmanh ah, hi hnu ah ka miphun hawi hna nih nan umnak ramkip cio ah nan rak pehzulh cio te lai timi ruahchannak ka ngei. Teinak Bawipa nih a ka pek asi ahcun ka miphun hawi hna caah le Australia rammi hna caah thathnemnak tlawmpal tal cu ka chuahpi khawh ve ko lai timi ka ruahchan.
Australia Cozah uknak hi dot (3) in an then i, Local Government i thimmi hi Councillor an ti hna. State Government hi MLA/MLC an ti hna i, Federal Government hi MP/Senator an ti hna. Keimah hi Councillor dirhmun caah kai zuammi hi asi.
Tutan ka zuam cawh dingmi pa hi, 1994 in hi thutnak hi a rak co cang lawng siloin, Mayor zong a tuan bal i, mipi nih theihhngalhtuk cangmi asi. A luanciami thimnak lebang ahkhan cun zuamcawhtu ngeilo in teinak a hmumi asi. Midang cu phaisa a tomtom in an hman i campaign an tuah len cang. Ka hnulei in MP/Senator/MLA le ramkhel bu tete zong nih an ka dirkamh len ve ko nain, Bawipa Pathian le ka miphun unau hi ka bochanmi nan si. Bawipa nih a herh a ti ahcun teinak cu ka kutcungah a chiah ko timi ruahchannak ka ngei fawn.
Thlacamnak he ka tanpi cio te uh. Teinak a ka petu cu Bawipa asi.
Lunglawmhnak tampi he,
Ram Tinthei
Perth, Western Australia

 

LEAVE A REPLY

Please enter your comment!
Please enter your name here