USA – Tuzarh chungah New York khua ah Vawleicung Ram 192 nih United Nations General Assembly kai thok a si cang. Hi hmun ah Burma ram aiawh in Vice President 2 Henry Van Thio a kai ve ding a si. A tu hi U.S ah a phan cang.

Vice President Henry Van Thio UNGA meeting kai ding in U.S. a kal lio

State Councilor Aung San Suu Kyi a kai dingin ruah cio a si nain, ram buainak ruangah kai kho lo in atu bantukin Henry Van Thio kai ter a si. Chinmi tampi nih ramkip hmaiah Henry Van Thio a min a chiatter tu a si I, Chin mi ca zongah thiltha lei si lo, ttihnung dirhmun ah a kan um ter a si tiah ruahnak a tam ngai. Cubantuk in, UNGA ah Chinmi nih bia kan chim khawh ding cu tuanbia thar kan tial a si I, kan I uang ding a si. A biachim ding zong hi tialpiak cia mi a si caah thil tha a si ko tiah ruahnak tha leiin a ruat mi um a si.

Mah kongah, Rakhin buainak pumpak in a hlathlai vet u Dr. Salai Ngun Cung Lian nih “ Vice President Henry Van Thio meeting kai ding in an kal ter mi cu a dirhmun an thlak a si. Hi meeting cu Ramdang vuanci an kal tawn I, Suu Kyi cu ramdang vuanci a si caah a kal awk a si. Tutan ah Vice President Van Thio an kal ter cu ka lung a tha lo ngai” tiah Rakhine buainak kong biaruahnak ah a chim.

“Asinain UNGA kan chinmi pa hnih an kai ding cu kan I lawmh awk a si. Thla kan cam awk a si” tiah Dr. Ngun Cung Lian nih a chim chap. “ Chinmi nih kan iralrin ngaingai a herh. Abik in Paletwa le Matupi lei khi kan I ralrin taktak awk a si” tiah Dr. Ngun Cung Lian nih a chimchap.

NLD ah achung sining a thei I NLD member zong a si mi Dr. Rodinga nih “ Chin pa a si mi Vice President Henry Van Thio le Chin pa UN ah Burma ram palai Hau Do Suan hna nih kan ram aiawh in bia an chim ding cu tuanbia thar kan tial a si I kan I lawmh cio awk a si” tiah Rakhine buainak kong biaruahnak ah a chim ve.

Tutan meeting ah hin Burma ram buainak kong hna tun cio a si lai. Mr. Guterres le Nuhrin Covo lei a tuanti hawi le hna nih Rakhine ram Bengali pawl buainak cu miphun tenau hrawh/hlauh/thianh (Ethnic Cleansing) phun in an zoh tiah New York Times nih a tial. Burma ram buainak kong hi UNGA ah abiapi bik in ngaih cio dingmi thil a si lai I, zohbik mi a si lai tiah a tial. Pakhatnak ah U.S President Trump dirhmun, Pahnihnak ah North Korea le pathum nak ah Burma ram kong tiah a dotdot in UNGA kong ah an tial.

A voi 72 nak UN General Assembly cu September 12, 2017 in September 25 tiang U.S ram New York ah tuah a si lai I , member ram vialte nih an ram kong biachim nak an ngei lai.

LEAVE A REPLY

Please enter your comment!
Please enter your name here