Chin Funtomnak Bu (Kalay-Kabaw) hruainak in a ralaimi October 17-20 tiang Tanphu khua ah Lai Kum Thar tuah an timh i hi ah hin US ram Chin Mino Bu dihlak ifonaknak simi Chin Youth Organization of North America (CYONA) President Salai Tial Khar Lyan a rak phan lai ti thawng kan theih.
Hi kong he pehtlai in Salai Tial Khar Lyan nih “CFB nih kan Lai Kum Thar tuahnak dingah kanmah CYONA ra ve dingin an kan sawm. CYONA Board of Directors zong nih kan ruah tikah (ramdang kan si caah kal khawh ahcun) va telpi ding a tha tiah kan ruah. Cucaah CYONA aiawh in keimah ka rat hniknak a si” tiah The Chinland Post ah a chim.
Salai Tial Khar Lyan nih tutan Lai Kum Thar rat aa timhnak kong he pehtlai in Kalay-Kabaw cu Chinmi tampi an umnak hmun a si caah kan miphun a tlau lonak ding le kanmah US um ramleng lei zong nih kan  ruah ngaimi a si ti hmuhsak zong ka duh tiah a chim.
“Kalay-Kabaw ah Chinmi tampi kan um i, Kawl lakah a thu dirmi kan si. Miphun tlau ah aa chuah cangmi le aa chuah denmang mi kan tam ngai cang. Khi hna sinah Chin miphun nan si, kan in philh hna lo, kan in ruah ko hna timi va langhter hi ramchung ummi lawng si loin ramleng ummi hrim zong nih va langhter ve hriam lai ti saduhthahnak ka ngei.”
Tanphu khua i Lai Kum Thar tuahnak dingah; CNF lei in Dr. Lian Hmung Sakhong, Salai Bawi Lian Mang, Colonel Solomon Thang Din le Pu Zo Tum Hmung hna, CYONA President Salai Tial Khar Lyan le US in hlasak thiam nu pakhat, Ramchung in CACC, Pu Zo Bawi, Pu Sui Thio le Pu Lal Thawm Thang hna, halsa ding in Hlawn Sung le David Lai an sawm hna ti kan theih.CFB nih khual lian an sawm cangmi hna kong he pehtlai in CFB General Secretary Pu Chan Lian nih “Kan sawm mi hna chung in tu tiang ah rat dingin aa fiang cangmi hna cu; CNF kan pa le hna Dr. Lian Hmung Sakhong, Salai Bawi Lian Mang le Colonel Solomon Thang Ding. CYONA President Salai Tial Khar Lyan le ramchung in hlasak thiam Hlawn Sung hna an si. A dang ai fiang rih lomi zong tlawmpal ah cun kan van fianh khawh te ko lai” tiah The Chinland Post ah a chim.
Lai Kum Thar ni ah hin capar qial zuamnak, pumpululh chuih zuamnak, leng dawh zuamnak le Lai nunphung laam zuamnak hna tiin zuamnak a phunphun zong tuah a si lai ti zong kan theih.  Chin Funtomnak Bu hruainak in Lai Kum Thar cu voi 2 an rak tuah bal cang i a voi khatnak cu 2012 kum ah Kyarinn khua le 2013 kum ah Khampat khua hna ah hlunghlai ngai in an rak tuah bal cang. Tutan tuah an timhmi cu a voi thumnak a si cang lai i Tanphu khua ah tuah a si lai ti kan theih.

LEAVE A REPLY

Please enter your comment!
Please enter your name here