CHIN (Hakha Post) – Rakhine buainak in Bengalis asiloah Arakan Rohingya Salvation Army (ARSA) ralhraang Chinram chung an luh lo ding Chin Ramkulh Palek nih ralrinnak a tuah, tiah September 11 ah Hakha Palek Zung in thawng kan theih.

“Hi ralrinnak hi kanmah Chinram lawng ah si loin Myanmar rampum ah tuah mi a si. Hakha zong ah nihnih kan tuah cang. Tu thla 19 tiang khi ralrinnak kan tuah lai, a herh ahcun a herh ning in pehzulh kan timh ko. Palek thazaang zong minung 100 hrawng kan si. Khuachung, khualeng le a herhnak hmunkip ah ralring tein chun he zaan he kan congh. Khuami zong thinphang in um hlah u, kanmah nih a si khawh chung in kan tawlrel ko. Amah belte, khual kan tlawnnak ah maw, asiloah kan vahvaihnak ah thawngpang pakhatkhat kan theih mi, kan ton mi, kan hmuh mi a um sual ahcun Hakha Palek Zung 070-21029 ah pehtlaih le thawngthanh daithlang hlah usih,” tiah Hakha Palek Sakhaanhmu U Thein Zaw Oo nih The Hakha Post ah a chim.

Hi ralrinnak an tuah hi ARSA nih Myanmar ramchung hmun tampi ah bomb kan puah lai, tiah an i hrocer mi kong ah siseh, Bangladesh zong nih i dornak hmun a pek ti hna lo tik ah Rakhine he ramri a si mi Chinram zong ah an luut kho i atu bantuk in ralrinnak an tuah hi a si.

LEAVE A REPLY

Please enter your comment!
Please enter your name here