Florida – Hirricane Irma ti mi totho thlichia cu a tu hi Florida a phan ziahmah cang. Florida I nichuah-thlanglei a um mi milu 25,000 leng nih mei an ngei ti lo.

Thlichia hi nazi pakhat ah meng 135 nak rang in thli a hrang ding a si (Mawtaw mawgh tikah nazi pakhat ah 75 hrawng a tam bik in mawh a si. A let hnih in mah nak in a rang lai ti nak). Ruahsur ruangah tilu zong pe 6-12 kar lak a thuk lai. Inn tampi a phum lai. Florida nih hi bantuk tihnung kokek totho thlichia an tong bal lo.

Nawlngeitu hna nih umnak zaamtak ding an ti mi hmun I a um mi paoh cu zaam ding in a tu le tu an fial hna. “Hi totho thlichia hi na ing kho lai lo. Zaam ding in fial mi hmun ah a um mi na si ah cun zaam tak zokzok. Na in le lo cu kan sak in kan remh than khawh. Na nunnak le na chungkhar nunnak cu kan ser than kho lo” tiah Florida Governor Rick Scott nih a tu le tu thanhnak a tuah.

Florida ramkulh ri hrawng um mi South Carolina le Georgia lei zong a den pah lai tiah ruahchung a si. Georgia ah khua cheukhat hna cu an um nak zaamter an si ve cang.

Florida ah hin Laimi tam ngai an um ve. A bik in Jacksonville ah hin an tam khun. Florida ah a um mi Laimi nih zei dah nan dirhmun a si timi thawng rak kan thanh kho uh law kan duh : chincablechannel@gmail.com silole facebook: Chin Cable Network Channel ah ca rak kan kua.

LEAVE A REPLY

Please enter your comment!
Please enter your name here