MYANMAR (Hakha Post) – Vawlei cung ah kum no bik in daihlak laksawng (Nobel Peace Prize) cotu Pakistan miphun Malala Yousafzai nih a Twitter cahmai (Online) in Nobel Peace Prize cotu Daw Aung San Suu Kyi sin ah ca a kuat.

A cakuat ah hitihin a tial. “Keimah bantuk in daihnak laksawng a co ve mi Daw Aung San Suu Kyi nih Rakhine ram buainak le a bik in Rohingya (Bengali) pawl hi a zohsawh hna awk a si lo. Hiti thahnawn le sualnak a ngei lo mi ngakchia thah, an innlo khanghpiak in har an ton mi ka zoh ahhin ka mitthli a tla lengmang. Myanmar ram ah a chuak mi cu khoika rammi dah an si lai, Myanmar rammi sinak tling zong a pek hna awk a si. Cun, kanmah kan chuahkehnak Pakistan le Bangladesh rammi zong nih Rohingya hartong pawl hi an eidin kong ah siseh, an thutdir nakding kong le an i dor nakding tiang kan bawmh hna i kan tawlrel deuh hna awk a si,” tiah cakuat a tial.

Malala cakuat cu Daw Aung San Suu Kyi nih hitihin a leh ve. “Nobel Peace Prize laksawng cu an duh ahcun ka chut than ko hna seh. Asinain, kan ram ah Rohingya pawl hi zeitihmanh in rammi sinak kan pe kho hna lo. Kanmah ram kong ah ahohmanh nih hnekchom le hramhram in tuahternak nawl an kan ngei lo. A ingtu taktak zong kanmah rammi kan si. Arakan Rohingya Salvation Army (ARSA) cu ralhraang taktak pei an si cu. Hi bantuk thahnawnnak tiang a chuahpitu ARSA hi rammi sinak kan pe kho hna lo,” tiah lehnak ca a tial ve.

Hi kong ah Myanmar rammi cheukhat le ramkheel riantuantu cheukhat nih Malala sin ah thinhung nawn le bianeek nawn in an hmuh ning an tial cio. “Ngakchianu aw, meithal hmai ah dingteo in a kal ngam mi nu kha, hnulei in meithal kahsual mi nih naa tahchunh awk a si lo, ningzak tuk na si. Mah ram Pakistan zaamtaak in UK ah aa dor mi nih, UK ram kaltaak in Myanmar ram aa thimtu cu i tahchunh hlah, ningzak tuk na si. A intuarnak le na intuarnak cu tahchunh tuah hlah, na kumkhua nih a intuar zat hmanh a phan rih lo, ningzak tuk na si.” “Taksa in, fimthiamnak in, hartuarnak in, riantuan mi in, ralthatnak in, a zeizongte ah na pi tluk a si mi na zomhtaih ngam mi hi mah hngal lo na si. A thli in kan ram ah a rak luut mi Bengali cu hmun kan cheuh hna in rammi sinak pek cu na chim, Tlangcungmi (Rakhine) pawl ceite in an kan thahnawn chapchap ah Nobel laksawng an rak in pek hi an palh.”

“Malala, nang cu kum 20 te lawng a si rih mi na si. Nangmah sining zoh in chanthar ramkheel riantuantu pawl sining tampi a lang. Nangmah le nangmah cu ramkheel riantuantu (politician) ah naa ruat rih. A ngaingai cu ramkheel puaisa pawl nih an duhnak poh ah thui khawh mi tunu/milem (idol) tluk men na si. A thlithup in a rak luut mi Bengali nih Myanmar ram ah zeitluk buainak dah an chuahpi ti hmanh hngal loin rammi sinak pek ding tiang na aupi ngam hi cu ningzak tuk na si,” tibantuk in a phunphun in soiselnak ca an tial cio. A cunglei biachuak pawl hi Malala nih “Nobel Peace Prize” laksawng cotu veve dirhmun in zuamcawh bantuk in ca a kuat mi kong ah mi tampi nih an hmuh ning an lehnak bia a si.

Malala cu Taliban ralhraang nih a lu ah meithal in an kah sual nain an thlop manh mi a si. Ralhraang tih in Pakistan a chuahtaak i UK ah a zaam mi a si. Ngakchia fimcawnnak le nu hna covo lei ah biatak chuah in rian a tuan mi a si. Cu dirhmun in Daw Aung San Suu Kyi sin ah ca a kuat mi kong ah atu bantuk in mi cheukhat nih an duhlonak biachuak an tial cio hi a si.

Compiled by: Salai KB Laikhal

LEAVE A REPLY

Please enter your comment!
Please enter your name here