Naypyitaw (Hakha Post) – India ram nih Myanmar rammi ca ah e-visa dah ti lo a dang visa pohpoh cu a lak in tuahpiak ding le India ram thong ah Myanmar rammi a um mi 40 chuah ding in Myanmar ram a rak tlawng mi India Chief Minister Modi nih a chim.

Hi bantuk in Modi nih a chim hi, Myanmar ram Ruahnakpetu Daw Aung San Suu Kyi he an i tonnak hmun ah a chim hi a si, tiah Myanmar ram Ruahnakpetu Zung in thawngthanhnak a tuah. Myanmar ram a rak tlawng mi India Chief Minister le Myanmar ram Ruahnakpetu an i tonnak hmun ah an i ceihmai mi cu, ram uknak, biaceihnak, thimnak le thawngzamhnak lei ah thangcho chinchin ding in ram khat le ram khat i bawmhchanh ding, cun, ramri lei humhimnak, rili cung i pehtlaihnak, Kaladan planning, Sittwe tibual le Paletwa planning pin ah ngandamnak le fimcawnnak kong ah ram khat le ram khat i pehtlaih in i bawmh ding hna an si.

Rakhine ram buaibainak kong ah India nih humhimnak lei i bawmh ding in a ti mi cung ah Ramkomh Ruahnakpetu Daw Auns San Suu Kyi zong lunglawmhnak bia zong a chim i ram khat le ram khat i pehtlaihnak fehter chin ding in i zuam ding zong a chimchih. India CM le Ramkomh Ruahnakpetu hna nih an hnatlak mi le i bawmh ding in bia an i ruah dih hnu ah an biakam fehternak ca ah minthutnak zong an ngei. India CM Modi cu September 5 in 7 tiang Myanmar ram a caam i Nay Pyi Taw, Pagan le Yangon khuachung min ngei hmun hna ah a kal.

(Ref: DVB)

LEAVE A REPLY

Please enter your comment!
Please enter your name here