CHIN (Hakha Post) –  Chin Ramkulh Hluttaw meeting tuah caan ah khua kip le Peng kip in Hluttaw Palai hna nih an Peng ca ah hal ding mi thil pakhat tal chuahpi lo in taklawng a ra mi Palai cu Hluttaw Palai ah an i tlak lo, tiah Chin Ramkulh Hluttaw Chairman Pu Zo Bawi nih a chim.

“Hluttaw meeting sinalak ah an Peng ca ah tuah ding mi thil pakhat khat asiloah biahalnak pakhat khat cu an i chuahpi hrimhrim a herh. Peng pakhat thanchonak ca ah tuah ding mi a tam tuk ko. Cu chung i pakhat te tal Hluttaw ah a chuahpi kho lo mi Palai cu Palai ding ah aa tlak hrimhrim lo. Hluttaw meeting caan poh i taklawng rat lengmang cu Hluttaw Palai ah an i tlak lo,” tiah Chin Ramkulh Hluttaw Chairman Pu Zo Bawi nih The Hakha Post ah a chim. Hi bantuk in Peng kip Hluttaw Palai hna taklawng in meeting a kai mi hna kong ah Pu Zo Bawi nih, “Hihi tlawmpal tete le duhsah tein kan i reng pah lengmang ko. I cawnpiaknak zong kan ngei lengmang ko,” tiah a chimchap.

A voi riatnak Chin Ramkulh Hluttaw Meeting cu August 30 in 31 tiang tuah a si i a ni khatnak August 30 ah Hluttaw Palai hna nih biahalnak hleihnih le biatung pahnih an chuahpi i a ni hnihnak August 31 ah Hluttaw Palai hna nih biahalnak pali an chuahpi than, tiah theih a si.

LEAVE A REPLY

Please enter your comment!
Please enter your name here