Hakha, Chin (Hakha Post) – Chin Ramkulh ah Na-Ta- La tender, Khuate Thanchonak tender, Sipin tender tibantuk in auh a si i a luancia caan ah ziknawh le eihmuar a um ko, tette he fiang tein a thei mi nih ca rak tial ulaw dan kan tat hrimhrim hna lai, tiah Lamsuul Minister nih a chim.

Tender sok kong ah zihnawh le eihmuar in tuanvo ngeitu nih rian an tuan. Tender soktu zong nih zik an va nawh ve hna. A cheu cu tender sok hlan le hmuh hlan in rian a rak i thawk chung mi hna an um, hihi ziknawh a um ruang ah an tuan chung ngam mi zong a si, ti mi kong, “A um lo kan ti lo. A um ko. Amah belte, tette tha he ca rak tial ulaw dan kan tat ko hna lai. Kanpetlet pa zong tangka sing 20 in zik a nawh. An va sok tik ah nannih company kan hngal hna lo, a rak ti hna. Tangka zong cu a pe than fawn hna lo. Amah lawng si lo, Minister hlun pakhat zong Na-Ta-La tender in tam ngai a ei an ti. Chim duh mi cu a herh ning in le a caan a zaat tik ah dantat an si ko lai,” tiah Minister Pu Sui Thio nih The Hakha Post ah a chim.

“Amah belte, aho ka si, cu company kan si tiin lenkai le i theihternak tuah cu a tha deuh tuk ko. Lenkai ti tik ah kutput he lenkai theng a herh lo. Amah belte, minung hi kan i khat cio lo bantuk in lenkai tik ah kutput theng a duh mi le a cohlang mi zong cu an um ve ko lai. Asinain, a chim tam le lenkai tam deuh mi hrat cu ruahpiak deuh le khaanpiak deuh cu an si ko. Hiti tik ah lenkai hrimhrim a herh tinak zong a si fawn lo,” tiah a cunglei Minister nih a chimchap. Tender zulhphung hi 2013 April 5 an rak ser i 2016 August thla ah an remh than.

2016 August zulhphung kha September 6 ah thlen, 2017 April 10 thlen than tibantuk a si. Committee nih mark an pek tik ah profile zoh in Engineer tha mi, kum 5 tal rian a tuan cang mi, sing 1000 man tender ah sing 500 tal tangka a ngei maw, seh le thilri tlamtling a ngei maw tibantuk kha zoh a si, tiah kan theih.

LEAVE A REPLY

Please enter your comment!
Please enter your name here