Washington – 2012 lio ah President Obama nih DACA (Deffered Action for Childhood Arrivals) timi phung cu a mah nawlngeihnak hmang in a rak nunter. Hi phung cu, U.S ram ah nu le pa nih phungning loin an rat pi mi hna an fa le kumtling lo hna, U.S. ah phungning in an um I an ram ah kuat an ton lo nak dingah hman mi phung a si. Milu 800,000 nih mah DACA dirhmun in U.S. ah khua an sa hna.

DACA dirhmun in khuasak khawh nak ding ahcun kumtling loin Nu le Pa nih rak luhpi mi an si a hau I, U.S. ah sualnak a tuah bal lo mi an si a hau. Cun, kumhnih ah voikhat in an sok lengmang a hau mi a si. Hi phung cu President Trump nih phungning loin nunter mi a si caah ka hrawh lai I, thla ruk chungah U.S. phunglam sertu (Congress) nih lam thar kawl hna seh tiah September 5, 2017 ah nawl a chuah.

President Trump nih hi nawlchuahnak a tuah mi kongah soisel tu tam pe le, phung a zultu president a si tiah a tanh tu tampi an um ve. A tu lio te U.S phunghram ning cun U.S. ah phungning loin a lut mi paoh cu an ram ah kuat than ding ti a si. President pakhat nih a mah nawlngeihnak lawng hmangin (Executive Order) phung a ser mi cu President dang pakhat nih a duh tik caan paoh ah a thah than khawh mi a si.

Congress nih thlaruk chung mipeem hna kong phunlam ser nak caan an ngei. Congress kut cung ah Nu le Pa hna nih kumtling loin U.S. ah phung ning loin an luh pi mi hna hmailei nunnak a um cang. Phungning loin a rak lut mi hna hi Sianginn kai lio mi, rian feltein a tuan mi, ralkap a tla mi le nun dawh tein a nungmi an tam pi bantuk in mitha lo le misual (gang) hna ah a tel mi zong an um ve hna.

DACA in khua a sa mi hna lak ah hin Mexico le a pawngkam ram mi hna mi tam u an si I, Asia le Africa lei hna zong tlawmpal an um ve hna. DACA cu June 15, 2007 hlan ah U.S. ah nu le pa (Parents) hna nih phungning loin rak luh pi mi hna le visa in rak luh I a tang beh mi hna caah sermi phung a si.

Ch: CNN, Fox News, ABC

LEAVE A REPLY

Please enter your comment!
Please enter your name here