Hakha, Chin (Hakha Post) – NLD Cozah thar a kai hnu ah thil tha le rian tlamtlinh mi cheukhat cu kanmah tuanchuah khawh mi tiin an i laak i, thil thalo pohpoh cu Cozah hlun kut a si, tiin sual an kan puh, tiah USDP party in Hluttaw Palai Pu Van Thawng nih September 4, The Hakha Post ah a fianter.

“The Hakha Post thawngzamhca nih biahalnak a tuah mi Sipin Minister nih a leh mi ziknawh le eihmuar kong hi Cozah hlun zei rel lo le daithlang tuk in a chim mi bia a si. Ziknawh le eihmuar cu kanmah Cozah hlun (USDP chan) zong ah nan ei e, nan hmuar e, ziknawh a um e, an kan ti ko. Chief Minister hlun Pu Hung Ngai zong nih ‘a um ko lai nain, aho nih, anih nih cu zat a ei, dingfel loin rian a tuan ti zong aho nih langhter le tette taktak a um tung lo, tiah a ti ve. Chim duh mi cu, Cozah hlun ah ziknawh le eihmuar a um an kan ti bantuk in atu Cozah thar zong ah a um, an ti ve ko. A ho nih tette nan ngeih tung lo, tiah leh si loin Cozah hlun lawngte sual an kan puh hi cu kan duh ve lo. Sipin Minister nih, ‘2016-2017 kum budget a si, kanmah kan si lo,’ a ti mi zong hi kannih Cozah hlun tangka kum cu 2011-2012 tiin 2015-2016 kum tiang hi kan tangka kum a si. 2016-2017 tangka kum cu Cozah thar kut bak a si, kanmah kan si lo,” tiah MP Pu Van Thawng nih The Hakha Post ah a chim.

“Cun, Hluttaw nih upadi 26 kan ser, an ti mi zong hi a ngaingai cu Cozah hlun nih 24 kan sercia mi a si i, Cozah thar nih 2 lawng a ser mi a si. Thil thalo poh cu Cozah hlun riantuantu an kan puh i thil tha poh cu Cozah thar nih minthatnak an i laak. Zeibantuk hmanh hi tuanvo kan laak ngam awk a si. Careltu hna thinlung zong ah a um sual nakhnga lo, duhlonak cathanh zong kan chuah,” tiah a cunglei MP nih a chimchap.

A cunglei fianternak a tuah mi hi Chin Ramkulh Cozah nih August 15 ah kum khat chung an riantuan mi mizapi sin fianternak an tuah mi ah Chin Ramkulh Cozah Sipin Minister Salai Isaac Khen le Chin Ramkulh Hluttaw Duh-hngyun- kyayee-hmu U San Oo nih fianternak an tuah mi kong ah MP Pu Van Thawng nih atu bantuk in a lungtlinlonak a langhter hi a si.

LEAVE A REPLY

Please enter your comment!
Please enter your name here