Thantlang, Chin (Hakha Post) – Thantlang Peng, taanghra awng mark santer deuhnak ca ah committee dirh mi hna hruainak in Thantlang khua BEHS No. 1 ah lakphak dawr le sianginn zaanriaktu umnak inn sak a si lai, tiah thawng kan theih.

“Thantlang khua BEHS No. 1 sianginn cu lakphak dawr a um lo ca ah nulepa nih sianginn a kai lio mi siangngakchia ca ah eidin zuarnak dawr hi um sehlaw a tha hnga an ti. Cucaah, sianginn lei committee ser mi hna nih siangngakchia ngei nulepa sin ah inn khat ah tangka Ks. 5,000 cio, cachimtu hna nih minung pakhat Ks. 10,000 le committee upa hna chung in minung pakhat tangka Ks. 20,000 cio khawlh in sak timh mi a si,” tiah Sianginn lei Committee Lutlai Pu Obed nih The Hakha Post ah a chim.

Hi kong he pehtlai in BEHS No.1 Sianguk Pu Thang Cem nih, “Sianginn chung ah lakphak dawr tuah kan duhnak hi cachimtu hna hi leng ah chuak tuk ti loin sianginn chung lawng ah um hna sehlaw eiding cang hna seh ti kan duh. Cun, inn tinnak ca ah aa hlat tuk mi zong nih dinh caan karlak ah inn tin hau ti lo in sianginn chung ah lakphakti zong ding kho hna seh ti zong kan duh ca ah a si,” tiah The Hakha Post ah ah chim.

A liamcia mi 2016- 2017 tangka kum zong ah sianginn lei kong committee upa hna hruainak in BEHS. No.1 ah cachimtu hna umnak quarter inn 2 sak a si cang.

LEAVE A REPLY

Please enter your comment!
Please enter your name here