HAKHA (Hakha Post) – Hmun dangdang in Hakha khuachung ah motor a lut mi motor nih a phurh khawh mi ton zat lonh in thil a phur mi poh cu Hakha khuachung luh kham an si cang, tiah thawng kan theih.

“Hihi motor khaltu cheukhat cu an daithlang hna i phurh khawh mi ton zat lonh in an rak phurh peng. Khualuhnak ah zohfelnak a tuahtu hna nih a thil phurh mi an thumter than hna tik ah pakhat le pakhat kar ah i theihthiam lonak tete a um lengmang. Hihi khuachung lam him deuh seh ti kan duh ca ah a si ko. Zohfeltu hna umnak kam ah ca nganpi in onh lo mi pohpoh kan taarpiak ko hna. A zoh i an zulh ding kha an rian a si ve ko,” tiah Hakha Peng Soh-loh-ye Zung riantuan pakhat nih The Hakha Post ah a chim.

Hi bantuk in motor pakhat nih a phurh khawh mi zat ton lonh in a phur mi fimhchimhnak le cawnpiaknak cu March thla in thawk a si April thla in luh kham le tlaih an si cang. Motor pakhat nih a phurh khawh mi zat ton lonh in a phurh ahcun Lamlei Upadi dal 5, phungrelnak 8 (B) ning in tangka Ks. 50,000 in Ks. 500,000 le thong thla 6 tiang thlak khawh a si, tiah theih a si.

“Cheukhat motor cu lam hlatpi in an ra nain ton lonh in an phurh ca ah khuachung luhnak nawl an pe ti hna lo. These, Lung le a dangdang an phurh mi kha an thumhter hna ca ah i hmuhthiam lonak tete a um lengmang. Cucaah, Chinmi chung zong in motor khaltu hna nih nawl zul tein thil phur usih law i hmuhthiam lonak zong a um hnga lo,” tiah Motor Zohfelnak kam um mi upa pakhat nih The Hakha Post ah a chim.

Hmanthlak: Youtube ah lak chommi

LEAVE A REPLY

Please enter your comment!
Please enter your name here