Hakha, Chin (Hakha Post) – Hakha Peng Buanlung khua ah zawtnak tlangrai thalo a tlung, khuami zatceo renglo an zaw, minung pakhat a thi i lungrethei in an um, tiah khuami sin in September 5 ah thawng kan theih.

“Hi tlangrai hi zarh hnih chung hrawng a vahnak a si cang. Thla thum ngakchia cu a thi. Naungeihtertu Sayama pakhat nih H1N1 zawtnak a si sual hnga maw, tiah Hakha siiinn ah a zohfel i H1N1 cu a si lo, zawtnak tlangrai pakhat a si ko a ti. A zaw mi hi cuap phin, khuh, taklinh, lungmih le lungfimlo in um a si. Thitha a der mi cu upa he ngakchia he chungkhar milu 5 ah 3 hi cu kan zaw dih,” tiah Buanlung Baptist Khrihfabu Pastor Mang Cung Nung nih The Hakha Post ah a chim.

“Kannih khua hi Khuapi Khuatekomh chung um kan si i Health Assistant sayama pakhat nih September 5 hi a hung kan zoh lai i, a herh ning in siibawite zong tuaktaan le i thlop kan hau te lai. Save the Children zong ka chimh hna i sii-ai zong an kan pek,” tiah a cunglei Pastor nih a chimchap.

Buanlung khua cu inn 164 khuasa an si i minung 854 hrawng an um. Atu tlangrai ruang ah khuami minung zatceo renglo an zaw i ngakchia pakhat cu a thi, tiah theih a si.

Hmanthlak: Buanlung le Loklung kar leihmun by Senthang View

LEAVE A REPLY

Please enter your comment!
Please enter your name here