CHIN (Hakha Post) – Myanmar ram lemcanthiam minthang Fitlaw Wai Lu Kyaw le a hawile 10 cu September 5 ah Hakha an phan lai, Thantlang Peng Tikir khua tiang an lan lai, tiah tuanvo ngeitu sin in thawng kan theih.

“Tutan hi a caan aa tet ngaingai. Rakhine Ramkulh Maungdaw khua buainak ruang ah hartong pawl sin ah a va kal i Yangon-Mandalay-Kalaymyo in Hakha ah September 5 khi a hawile 10 he an rak lan lai. September 6 ah hramhcii a hun phurh mi Mount Carmel Private School ah cinnak an ngei lai. September 7 ah Hakha mino hna le Media hna he tonbiaruahnak a ngei lai i, CCU ah siaherh biachimnak zong a ngei lai. September 8 khi Tikir khua ah a lan lai i hramhcii cinnak siseh, September 9 ah lemcang Fidi a hun i ken mi hna he Baisakup an i thla lai,” tiah Hakha in Wai Lu Kyaw khuallam tawlreltu Pu HC. Than BikLian nih The Hakha Post ah a chim.

“Wai Lu Kyaw hi Chinram a phan bal cang. Tutan hi Australia ram hramhcii a hun phurh i Hakha le Tikir khua ah cinnak a ngei lai. Hi hramhcii hi thih a thiam lo mi hramhcii a si, an ti. Satil kip nih an ei khawh mi a si i satil zuatkhalhnak ca ah a tha ngaingai mi a si. Chinmi kan sifah ning a hmuh tik ah hnakkartenh in furpi a si nain a caan a hun pek hramhram mi a si. Hi kong ah Myanmar ram Vice President-2 Pu Henry Van Thio he zong tonbiaruahnak an ngeih cang mi a si. Tutan hi cinthlaknak lawng si loin, mino tampi hna he tonbiaruahnak ngeih ding siseh, Tikir khua ah lemcang Fidi a hun i ken mi hna he Baisakup thlaak pah in a rak tlun mi a si,” tiah Wai Lu Kyaw khuallam ah tuanvo ngeitu Evan. Tluang Thang nih The Hakha Post ah a chim.

Fitlaw Wai Lu Kyaw cu, “Mi ca rian ka tuan mi tha a ka pe lotu nupi ka thit sual lai ka phang,” tiin nihin tiang nupi thi loin a um mi a si. Wai Lu Kyaw Foundation a dirh i hartong mi hna bawmhchanh in a caan a hmang. 2015 kum Chinram kokek harton lio zong ah chawva, thilri le cawnpiaknak phunphun he amah mipum tel in bawmhchanhnak a rak tuahtu a si.

LEAVE A REPLY

Please enter your comment!
Please enter your name here