CHIN (Hakha Post) – Chin Ramkulh Cozah nih August 23 meeting ah Chinram chung ramsa kah lo ding le licence ngei lo meithal tlaih dih ding kong fimchimh chungnak cu 2018 January thla tiang lawng siseh, tiah nawl a chuah, tiah kan theih.

Hi meeting ah biachah mi cu, Ramkulh, Pengkomh le Peng nih kokek thingram runvennak phu dirh mi fehternak, Licence ngei lo meithal tlaih dih ding fimchimh chungnak cu 2018 January thla tiang lawng siseh, ram meiduah hlah, na khangh ahcun thla 6 thongthlaak ding ti mi signboard taar ding, hual mi thing hau lo ding, hau ahcun kum 2 thongthlaak ding ti mi signboard taar ding, Ramkulh Thinghual Zung nih Tlor kung le thinghak dah ti lo, thingkung dang vialte ca ah upadi ahran ser ding le Pengkomh Zung hruainak in fimchimhnak tuah ding, tibantuk biachahnak an tuah.

“Hi biachahnak hi Chin Ramkulh Hluttaw nih kum khat chung kan riantuan khawh mi lak ah kaa lunghmuih bik mi a si. Kan ceihkhan sawhsawh mi a si lo. Biatak chuah in kan tuan ding mi rian a si. 2018 kum thawk in licence ngei lo meithal kan tlaih dih lai. Sakap mi cu dantat thluahmah an si cang lai. Sa an kah ahcun an kah mi sa zoh in tangka dantat an si lai i khuaram thanchonak ca ah hman a si lai,” tiah Chin Ramkulh Hluttaw Chairman Pu Zo Bawi nih The Hakha Post ah a chim.

“Chin Ramkulh chung ah licence ngei mi meithal hi 13,253 a um. Mindat Peng ah a tam bik. Licence ngei lo meithal hi zeizat remruam dah a um rih hnga. Sa an kah ahcun kum 7 tiang thongthlak khawh a si. Cu kong ah Chin Act (upadi) caang 34/4 zong ah a um mi a si. Sakah khap ti tikah licence ngei meithal zong in duh tik caan poh le zeibantuk ramsa poh kah khawh a si ve lo. Meithal zong ka pupa nih licence ngei mi meithal an ka roh mi a si, ti khawh a si lo. Ro ah an rohtaak mi a si zong ah lience a thlen awk a si. Amah belte, licence a rak ngei lo mi cu a thar in tuah khawh zong a si fawn lo,” tiah Chin Ramkulh Upadi Lutlai Pu Sonny Thang Cung nih The Hakha Post ah a chim.

 

LEAVE A REPLY

Please enter your comment!
Please enter your name here