Kalaymyo (Hakha Post) – Kalay University ah Lecturer Daw Than Than Maw nih Chin siangakchia hna sin ah Chin miphun zomhtaih le thlanglamh in bia a chim mi cu Chin Literature and Culture Committee (CLCC) nih August 30, Pyidaungsu Fimcawnnak Minister Zung ah report ca an tial.

Daw Than Than Maw nih, “Nanmah Chin mihrut, sifak hna nih mei man nan pek duh lo ruang ah Kalay Meng 9 Sang um, kanmah tangka a pe kho mi Kawl pawl zong mei kan hmu kho lo. Mei hmuh duh ah Chin inn pakhat lung in nan cheh, tangka pek duh lo ruang ah tanglei lam in nan kal. Chinmi hi fawizaang in tangka hmuh nan duh, fel tein riantuan nan zuam fawn lo. Midang tuancia mi i rinh lawng nan duh i nanmah cu tuan nan zuam lo. Thluak ngei lo Chinmi hna,” tiah a chim ruang ah report ca an tial hi a si, tiah thawng kan theih.

“Hi report ca kan tial mi hi 2017 August 23, Kalay University Building-G, Room No. 3 ah Myanmar subject a cawng mi siangakchiatampi lak ah Chinmi minung 7 zong an cawng ve i sianginn ca he aa pehtlai lo mi miphun thleidannak le nehsawhnak bia a chim. Mah siangakchia minung 7 cu kan sin ah an ra i buainak faakpi in a chuah sual lai kan phan ca ah kan thlauh hna. Phan awk ngai a si mi cu camipuai an phit mi zong Daw Than Than Maw nih a zoh lai i a sunghter dih sual hna lai, ti hi a si. Cucaah, Pyidaungsu Fimcawnnak Minister Zung ah ca kan tial hi a si,” tiah The Hakha Post Senior Reporter le CLCC Secretary Salai James Neih Thang nih The Hakha Post ah a chim. Hi report ca cu Pyidaungsu Fimcawnnak Minister Dr. Myo Thein Gyi sin ah siseh, theihpitu ding ah Sagaing Ramthen Chief Minister Dr. Myint Naing, Sagaing Ramthen Chin Affairs Minister Pu Lal Thawng Thang, Sagaing Ramthen Hluttaw Palai Daw Thant Wai Kyaw, Kalay University Professor Lutlai chang Dr. Myint Swe le CLCC (Yangon, Mandalay, Monywa, Pakokku) President le Secretary hna sin ah an kuatchih, tiah thawng kan theih.

Hi report ca cu Pyidaungsu Fimcawnnak Minister Dr. Myo Thein Gyi sin ah siseh, theihpitu ding ah Sagaing Ramthen Chief Minister Dr. Myint Naing, Sagaing Ramthen Chin Affairs Minister Pu Lal Thawng Thang, Sagaing Ramthen Hluttaw Palai Daw Thant Wai Kyaw, Kalay University Professor Lutlai chang Dr. Myint Swe le CLCC (Yangon, Mandalay, Monywa, Pakokku) President le Secretary hna sin ah an kuatchih, tiah thawng kan theih.

LEAVE A REPLY

Please enter your comment!
Please enter your name here