FALAM (Hakha Post) -Baptist ramchung missionaries thlah mi dihlak i tonpumhnak le Pathian thangthattinak cu Chin Baptist Convention (CBC) hruainak in November 22 in 27 tiang tuah a si lai, tiah thawng kan theih.

“Hi bantuk in Baptist nih missionary kan thlah mi dihlak hmunkhatte ah i tonnak le Pathian thangthattinak ngeih ding hi saduh kan thahnak a sau ngai cang nain kan tlamtlinh kho rih lo. Atu tan cu tlamtlinh khawh ding in kan timh i a ni zong kan tuk cang. Hihi Baptist ramchung kan ti ko nain a dang tel a duh mi nih zalong tein i tel khawh a si thiamthaim. Aho poh lunglawm tein kan cohlan dih ko hna,” tiah CBC E&M Secretary Rev. Dr. Za Biak nih The Hakha Post ah a chim.

Hi bantuk in Baptist ramchung missionaries dihlak in tonpumhnak hmun ah thawngtha chimtu ding hna cu, Rev. Dr. Law Ha Ling, Rev. Dr. Timothy Pa Hrang, Rev. Dr. Simon Thawng Hmung, Rev. Dr. Cung Lian Hup le Rev. Dr. Dennis Shu Maung an si lai i hlasatu sawm mi hna cu, David Lai, Thang Thang, Aye Moe Aung le Noami an si te lai, tiah theih a si. “Khualtlung hi 650 hrawng si ding in ruahdamh a si i rammui ah a um mi hna min kan lak khawh chung mi hi 433 an si i 25 hrawng hi aa chap te kho men. Rammui ah missionary a thlahtu hna hi Khrihfabu, pumpak, ramdang le Bu pakhat khat in a thlah mi zong an i tel hna i cu chung ah a tlawm bik palai pakhat cio i tel ding in sawm an si,” tiah Rev. Dr. Za Biak nih a chimchap.

Hi bantuk in CBC ramchung missionaries dihlak tonpumhnak cu a voi khatnak bik tuah ding mi a si i ‘The 1st Missionaries Conference’ tiah min pek a si.

LEAVE A REPLY

Please enter your comment!
Please enter your name here