CHIN (Hakha Post) – Chin Ramkulh Hluttaw Meeting a ni hnihnak August 31 ah Peng kip MP chung in biahalnak biapi 4 an chuahpi tiah thawng kan theih.

Nihin a ni hnihnak Hluttaw Meeting ah Chin Ramkulh MP hna nih an chuahpi than mi biahalnak biapi pali hna cu: 1. Thantlang Peng in MP Pu Van Thawng nih, “Hakha Town Plan kauhchapnak le inn hmun thar zohfeltu committee nih (A) Thla nga chung ah rak cawh cia mi lam 4 kha a thar in cawhnak le rian umtuning kong (B) Pau chuah thla nga chung ah inn hmun samh dih mi le samh mi zat le hmun pek ning kong (C) Thla nga hnu July thla in nihin tiang rian tuanchuah mi kong (D) I tlukrual le dingfel tein pek mi inn hlaang, inn khan aa cheu mi hna inn hmun phawt dih cia mi dirhmun kong fianter ding in bia a hal hna.

2. Thantlang Peng in MP Dr. Hmuh Thang nih, “(A) 2015- ’16 chung ah tuanvo ngei Zung kip nih an rak chek ning ah Hakha ah phunglo in inn a sa mi inn zeizat dah um hna? (B) Tuanvo ngei Zung nih nawlchuah ruang ah hrawh than mi inn zeizat? (C) 2016-’17 tiang ah phunglo inn sa mi zeizatdah um than hna? (D) Biaceih Zung ah tazacuai mi inn zat le dantat mi zat? (E) Tazacuai le dantat ding a tanag mi inn zat le cu hna cu zeitik ah cuai te ding kong? (F) Hakha lawng si loin Peng dang zong ah phunglo inn sa an umnak le (G) Hi hnu ah hi bantuk phunglo inn sa umlo nakding zeitindah rian an tuannak kong bia a hal hna.

3. Thantlang Peng in MP Pu Van Thawng nih, “Hakha Timit dinti simanking tuanvo latu Myanma Ahla Company nih a tuan mi cu rikhiah mi caan chung i, a lim khawh lo mi kong ah Chin Ramkulh Cozah nih zeitindah a kong ceih le dantatnak nan tuah? tiah a hal hna.

4. Thantlang Peng in MP Dr. Hmuh Thang nih, “2015 Chinram chung ah kokek harnak le vawlei cimh ton lio ah kapkip in bawmhnak hmuh mi tangka cu Chin Ramkulh Cozah nih zeitindah a tlaih i a tawlrel ti le, 2016 March ah hi hartong bawmhnak tangka tang cu sing thongruk tluk a si tiah theih a si i, cucu zeitindah hman le nihin ah zeizat dah a taang ti le cucu zeitindah hman a si lai ti kong hna a hal hna, tiah theih a si

LEAVE A REPLY

Please enter your comment!
Please enter your name here