Chin (Hakha Post)- POST hi Hakha Post tinak si i, Kim hi Pu Kim En Mang tinak si.

POST: Pension laak tiang Cozah rian na rak tuan mi le caan na kan chim kho hnga maw? KIM: Kum 36 chung General Administration Zung ah rian ka rak tuan i ka pensioned hnu ah atu Hakha Chin Oo Si sang ah khua ka sa i atu hi kum 88 ka si.

POST: Editor na rak tuannak media le a kum na kan chim kho hnga maw?                   KIM: Mirang ca in chuah mi The Nation Daily News Thawngzamhca ah a si i 1957-1961 tiang ka rak tuan.

POST: Chinmi lakah media degree a hmu hmasa a si tiah kan theih i mizei nih, zeitik ah dah an in pek?                                                                                                         KIM: US in John Hopkins nih Yangon University ah an rak tuah mi Burma American Institute nih 1961 ah Dip.Journ. ti mi media degree an rak ka pek. Editor ka rak tuan hi kum 24 ka rak si in ka rak i thawk.

POST: Na rak tuannak thawngzamhca cu zeibantuk dah a si i zeitik in thawk mi dah a si? KIM: 1948 ah thawk mi a si. Cozah nih tuah mi si lo in private nih tuah i a za a long mi media a si. U Ne Win Cozah a kai in an rak kan phih. Mirang ca in chuah mi a si.

POST: Na rak tuan mi Editor hi zei bantuk dah a si?                                                     KIM: Night Editor a si. Chun ah thawng a ra mi vialte kha a thaizing arkhuang 3:00 hlan ah Circulation Editor cabuai ah chiah cia a si khawh nakding tuanvo ka ngei. Zaan 6:00 in 11:00 tiang ka tuan.

POST: Chun ah tah zeidah na rak tuan?                                                                     KIM: Yangon University ah ka rak kai lio a si i chun ah sianginn ka kai.

POST: Cu lio ah na thlahlawh tah zeitluk dah a rak si?                                                 KIM: Ks.200 in kaa thawk i Ks.600 in a dong.

POST: Editor pawl rian a biapit ning na hmuhning?                                                     KIM: Editor ca ah a biapi bik cu edit tuah tik ah rianrang tein rel khawh, fangkhat hmanh hrelh lo tein rel khawh, edit tuah lio ah thil dang ruah lo bak, midang he i chawnh le phone zong tlaih lo. Full concentration (thinlung dihlak) bak pek a hau. Thawng le article a ra mi pawl kha chuah awk a tlak maw tlak lo, ti kha tha tein zohfel a hau. Cun observation (kiangkap thil umtu ning ngiathlai) hi a pahnihnak a si. Editor cu a phanhnak hmun kip ah a mit kha camera lens bantuk in thil umtuning kha zoh le tlaih khawh aa zuam lai. Cun a thluak zong a cawlter peng a herh. Notebook le cafung he aa then lai lo. Thawng laaknak hmunhma ah thilthup le tihnung ralrin ding zong a um tawn. Kannih chan ahcun Media riantuan ka si ti hna hi chim ngam a rak si lo. Mi pakhat rak hmuh bal mi le a aw kha, cu aw cu, cuka hmun ah ka rak theih bal mi aw le mui a si, ti le an kaarhlaan le an kelamh thawng tiang hmanh in i chinchiah khawh a herh.

POST: Nan chan le nihin kan chan media zalonnak aa dan ning?                                   KIM: Kannih lio ah cun ni hleinga ah voi khat ti tluk hrawng hin media pawl chekhlatnak a rak um peng. By Weekly News Collection ti mi Sah Tung Lung nih an rak tuah. Atu zong hi nihin kan Cozah nih Mi Tat bantuk, zeibantuk an ti dek (Myanmar Crime Reporters Association) ti mi media riantuantu phun khat a tuah ve i khi zong khi i ralrin ngai a hau. POST: Atu ah hin mino dirhmun in Editor hei tuan than law tah?                                   KIM: Cozah lei tuanvo ngeitu anmah sin bak ah thawng fiang laak ding a si. An Zung chung ah cazi siseh, Vuanci siseh anmah bak hal ding a si. Cun lakphak dawr te hna ah thut pah a hau. Zing tuante ah lakphak dawr, car gate le market ti bantuk pawl ah phanh a hau. Cozah meeting ah an ceih mi pawl kha tial duh tik ah hihi na chim mi a si maw? tiin hal than ding. Asinain nihin Cozah lei upa cheukhat cu bia an chim ngam lo i Hluttaw hrimhrim kha innka kharkhumh Hluttaw phun a si. Asiningte ahcun Cozah nih an riantuannak hi rammi zapi a niambik sin tiang an theihter hna awk a si.

POST: Careltu nih an duhphun ah zeidah a si tiah na ruah?                                         KIM: Zapi Fimthiamnak kong le chawleh chawhrawl kong hi an duh bik phun ah aa tel. Kan ram ah zei hmanh a chuak lo ti ding a si lo. Tahchunhnak ah zapi nih an nih a chuak men lai nain, Chinram ah rathe (sangra) cin a fawinak, a zuar a fawinak kong zong hi a biapi ngai.

POST: Na rak tuannak media hi na tuan lio ah a rak hlawk ve maw?                             KIM: Hlawk e. A biapi cu company le Cozah Zung kip nih fakthanh an pek. Fakthanh hi a biapi tuk. Fakthanh man hi kan catlaap ah a tung lehhmah pahnih a kauh lehmah pakhat tluk ah Ks.20 kan rak laak i, a rak hlawk ngaingai. Cozah zung kip nih an riantuannak ah zapi theih a herh mi phun kip, a bik in tender le rian auhnak pawl hrimhrim hi cu media ah fakthanh an tuah hrimhrim awk a si. Cun pumpak riantuan mi hna zong nih an rian le dawr a man khawh nakding ah media ah fakthanh an tuah ahcun a tuah lo mi nakcun an miak deuh hrimhrim lai.

POST: Chin media ca ah holh phun aa dan tuk mi hi a zuarzamhnak ca ah zeidah a lawh te lai?                                                                                                                         KIM: Hihi 1957 lio tein fakpi in ka rak ruah ve mi a si. Kan holh hi zeitindah kan khahter khawh deuh lai ti hi ruah ding a si. Tahchunhnak ah kan holh aa khat mi tete kha chuahpi le i hmanpi hi a herh. Kei hoi hna nih cun Lushai (Mizo) holh hi kan i hrawm ah a tha bik tiah tuanpi in ka rak ruah bal.

POST: Chinmi chung in media riantuan hmasa bik tiah na ruah mi?                                 KIM: 1949 ah Pu Ngo Khaw Khai (Tedim) cu Mirang in chuah mi The Guardian Megazine ah Editor a rak tuan i 1953 ah The Guardian Daily Editor a tuan than. Amah hi pakhatnak a si tiah ka ruah.

POST: Kan i lawm tuk. Biaruahtu: Pa Pui

LEAVE A REPLY

Please enter your comment!
Please enter your name here