Houton, Texas – Texas ramkulh ah ruah le thli ruangah hartong mi rammi hna Chin mi nih bawmhnak lam khatkhat in tuah ve ding in Chin mi biaknak lei ah kan pa bik Rev. Dr. Stephen Hre Kio le, CBC USA mino caan saupi a hruai i, ABC USA ah rian atuan lio mi Rev. Dr. Ronald Charles Nunuk nih Chin mi le khrihfabu hna sin ah sawmnak ca an tial mi kan van tar. An tial ning tein kan tar. Remhpiak mi a um lo.

——————————————————————————————————

Rev. Dr. Hre Kio

CBCUSA chungtel Khrihfa ulenau hna,

Texas lei in thawngpang chia kan theih. A bik in Houston i a ummi tampi an harnak kan theih. Corpi Cristi lei zong an si. Laimi umnak a si ko lai i, kan Laimi an har ko lai, ti hna kan ruat. Laimi an si lo hmanh bomh hau tampi an um, ti cu a fiang.

Forhfial ka vun duhmi cu: Texas i a ummi Laimi Khrihfabu hna nih nan zuan hnawh khawhmi hna le nan bawmh khawhmi an um ko lai, tiah ka ruah. Ziah cucu bomh le zuanhnawh kan i timh lo? Kan ti khawhmi tete a um ko tung lai! Dallas lei, Texas kaa dang i a ummi falenau hna, nan i timh hnek lo. Thilri i bomh lawng a si tung lo, thazaang zongin bomh ding an um ko lai. Laimi kan dihlak in kan ti kho lai lo i, TX i a ummi nih cun nan ti khawhmi a um liangluang ko lai. Rak tuaktaan hnik ulaw a tha lo maw? Nan tuattaan cia zong a si ko lai. Pathian nih in hruai ko hna seh. Thla kan in campiak lengmang ko hna.

Van Lian pa
Atlanta, GA

Rev. Dr. Ronald Charles Nunuk

Hodah Kal Lai?

Harvey thlichia le ruahnih a tlunh hnawhmi Houston, TX le a pawngkam hna caah thlaza kan cam piak hna. Mah hi thil nih a hrawhmi vialte hi Dollar Billions leng asi lai tiah an ruah. Aemrica ram ah hibantuk kokek harnak tontik ah caan sau pi tiang harsetnak nih a zulh tawn hna. Cozah nih asi khawh chung in bawmh chanhnak a tuah ko bu ah a diklak um ek cun an thar chuah kho taktak lo. 2005 ah Katrina thlichia nih New Orleans, LA pi cu a rak tlak hnawh ve I ni hin tiang rebuilding program cu biaknak hna le NGO nih an tuan peng rih. Tik ah kan nih Chinmi America ram ummi nih teh zei tel kan tuah kho ve la lo maw ti hi ruah awk asi ve.

Hibantuk kokek harnak hi Chin khrihfabu caah mission field bantuk asi. America ram ummi Chin khrihfabu hna nih kan mah le si khawh ning cio in I tel ve kha a bia pi taktak. Hika ram kan phak ka ah cun miphun dang nih bawmhmi le chanhmi kan rak si nain, nihin ah cun harsa mi hna chanhtu le bawmtu dirhmun si kho ve ding in kan mibu zong thazang a ngei ve cang. Culawng si loin miphun dang hna nih refugee pawl hi bawmhnak ei tu lawng te an si tiah an kan ruahmi vialte an ruahnak khan mi bawm chantu Pathian fa le kan si ve ti langhternak caan tha taktak asi.

Tahchunhnak ah kan mah Carson Chin Baptist Mino 30 tluk cu New Orleans, LA rebuilding ah 2015, 2017 kum hnih chung zarhkhat caam in volunteer rian kan van tuan. Kan umnak in 1000 mile hlah asi. Kan tuan mi hi midang caah thil lian ngan asi lo nain, kan tuan duhnak lungput le ti tuan khawhmi te te cu Bawipa nih thluachuah a pek I miphun dang hna sin zong ah bia tampi a chim. Hi caah kan khrihfabu nu le pa nih thazang an kan pek I $ 10000 leng ding in kan tuan khawhnak asi. Mah bantuk mission rian tuan hi midang ca lawng ah si loin kan mino a kalmi hna hrimhrim lungthin put le ruahnak tampi a thlen I Pathian rian kong ah thuk deuh in pekchanhnak an ngei. Miphun dang bawm kho tu kan sive timi ruahnak tha kha a pek hna.

Cucaah America ram Chin khrihfabu hna nih Pathian nih America ram ah a kan thlah ko ti kha kan zumh lawng si loin, a tak in langhter caan asi. Mah siaremning le duhning in mission rian tuan cun hma a kal tawn lo, sinain kan huam lomi le kan duh lomi hmun ah nun tlum laak in mission rian tuan hram kan thawk ah cun kan Chin khrihfabu caah hlawknak a chuah pi tu asi lai.

Moses cu Pathian nih na kut chung ummi thengthunh kha hlawnh a ti I, a hlawnh tik ah a nungmi rul ah a cang, a tleih than tik ah a thimi thengthunh ah a cang. Kan kutchung ummi thil hi midang caah kan pek tik ah Bawipa nih a nun ter I sullam a ngeih ter. Chin khrihfabu nih tuan le thawk ve cang usih. Ngeih te lai dingmi in mission rian I timh siloin, nihin kan ngeihmi hna khan mission rian cu fial kan si.

Hi bantuk kokek harnak hi a kum in rebuilding a rau tawn caah, a ra laimi caan ah tuan awk tampi a um lai. Harnak tongmi khua hrimhrim ah volunteer organization tampi an um ko lai caah, timhlamhnak he thawk ah cun tuan awk tampi a um ko lai.

“Cun Siangpahrang ni cun, “Hihi kan chimh hna: Ka unau pakhatkhat cung ah, zeitluk hmanh in sifak le nauta si seh law, nan tuahmi thil paoh hi ka cung I nan tuah asi.” Matt 25:40.

Mah ca zong hi rel chap: Mah hi Hmet

Editor note: Cabia cu catial tu nih zapi sin ah an thlahmi ning tein lak than mi a si. Tlangtar tu khi aitlak nak bik in kan pek chom mi a si.

LEAVE A REPLY

Please enter your comment!
Please enter your name here