Indianapolis, Indiana – Kum 2017 chungah U.S. ah Burmese-American (Burma rammi) chung in College kaimi hna milu 85% (Zatuak 85) kan si. kum 2012 lio ah 43% College kaimi an rak si I,  kum 2012 in kum 2017, kum 6 chungah 97.7% (Zatuak 97.7) college kaimi cazin a kai tiah Burmese American Community Institute (BACI) hlathlai nak nih an hmuh.

“ Atu bantuk in college  kai a tim mi milu cazin a kai mi hmuh tikah lunglawmhawk ngai a si,” tiah  High School siangngakchia hna college an kai khawhnak a bawmtu BACI Upward College Programs I Director Lian Sang nih a chim.

Hlathlai nak nih, Burma rammi college a kai mi hna chungin aluan cia kum thum chungah 95% nih pehzulh tein an sianginn an peh hna I, tukum ah 97.64% an si tiah an hmuh.

BACI hlathlanak an hmuh mi zapi sin hmuhsaknak an tuah lio ah BACI Executive Director Elaisa Vahnie nih “ U.S. nih ralzaam hna nan huhphenh/kilkawi hna nak le nunnak thar ser khawhnak caan nan peknak hna cungah kan community dihlak kan I lawm” tiah a chim. U.S. hi hmai lei zongah, atu bantuk in, hrem a tuar mi hna nih idor nak tha bik ram a si lai nak ding a hnabeisei nak zong a chim chih.

BACI hlathlainak hmuhsak nak ah hin Stakeholders [Hruaitu] 100 leng an I tel khawh pin ah, U.S. Senator Joe Donnelly office in palai, U.S. Senator Todd Young office in palai le mipi nih thimmi cozah lei upa dangdang hna zong an itel kho hna.

BACI Chairman Dr. Ro Dinga nih, BACI thazang a petu hna cungah lawmnak bia a chim. Kan community zong hmunkhat teah cawlcang ti I kan mibu ca hlawknak chuahpi dingin sawmnak a tuah.

Hi hlathlainak cu zarh 8 chung tuah mi a si. Hlathlainak hi High School kai lio mi milu 47 nih an tuah I, college, graduate le doctoral a cawnglio mi hna nih an bawmhnak I an kutrit hna.

A buaktlak in Burma rammi hi U.S. ah milu 300,000 [singthum] hrawng kan um tiah BACI hlathlainak nih an phuan.

BACI nih hlathlainak an tuahmi chungah  ramkhel lei teltumnak, ngandam nak, college kainak kong, nunphung kong, Refugees kong hna an si.

BACI website ah mah kong miran ca in rel a duh mi nih atang link ah rel khawh a si.

LEAVE A REPLY

Please enter your comment!
Please enter your name here