Skip to main content

FBI nih Donald Trump le Russia karlak thimnak lio i pehtlaihnak kong cu a thli tein hlathlainak an tuah cang

 

Hlathlainak Committee Chairman nih Moscow le Trump campaign karlak pehtlaihnak cu atu tiangah zeihmanh kan hmu rih lo tiah a chim. 

FBI haotu nih 2016 US President thimnak ah Moscow le Donald Trump Campaign an I pehtlaihnak konghe pehtlaih in a thli tein hlathlainak kan tuah tiah avoi khatnak biafehternak cu mipi sinah phung ning tein a thanh cang. 

FBI Director James Comey nih hi hlathlainak hi kan tuah hrimhrim lai, cun a rauh hlan ah lim khawh kan i zuam lai tiah a chim. 

Comey cu Democrat Party chungtel tampi nih US president thimnak ah Hillary Clinton pumpak email kong hlathlainak a rak tuahnak ruangah soiselnak tampi a rak tong bal. 

Atu hlathlainak kan tuahmi kongah biafiang in kan chim kho rih lo. Donald Trump Campaign le a dang dang pehtlaihnak, Russia he pehtlaihnak um le um lo cu felfai tein hlathlainak kan tuah lai tiah Comey nih a chim. 

Donald Trump President a tlinnak konghe pehtlai in aa naih bik ah an rahmi Russia kong cu hlathlainak tuah dingin committee ser a si cang. 

Donald Trump nih US president thimnak ah Russia he pehtlaihnak zeihmanh a um lo tiah a rak chim. Obama nih Dipa thla ah Russia Diplomat minung 35 cu US in a rak ṭhawl hna. Obama tuahsernak cu Russia President Putin caah thinphan le ngaihchia in a rak tuah. Putin nih lehrul pakhat hmanh a rak cham lo. Mihrut hna tuahsernak a si tiah a bia tuin a rak leh. 

FBI Director Comey nih hi hlathlainak tuahnak konghe pehtlai in thilṭha lo tuahnak dingah a thli tein hnatlaknak an (Russia-Trump) ngeih le ngeih lo kong zong hlathlai chih a si lai tiah a chim. 

“Hi hlathlainak kan tuahnak ah midang pumpak dirhmun le an sining kha hnahnawhnak pek lo dingin kan i zuam lai, US mipi caah thilṭha bik chuah kan i zuam lai” tiah Comey nih a chim. Ref.: independent