Skip to main content

Donald Trump nih "Adolf Hitler biachimnak cauk" cu a bizu pawngah a chiah

Kum 1990 lio tonbiaruahnak ah mirumpa Donald Trump nih Nazi hruaitu Hitler cauk “Mein Kampf” cu ka ngei ko nain zeitik hmanhah ka rel bal lo tiah a rak chim. 

Hitler biachimnak cauk cu a bizu pawngah ka chiah tiah Trump nih a chim. 

Kum 1990 ah Trump nupi Ivana nih “kan pa nih ‘My New Order’ timi Nazi hruaitu biachimnak cauk cu a ngeih” tiah Vanity Fair sinah a rak chim. 

Marie Brenner, capar ṭialtu nih “Ivana Trump nih a sihne Michael Kennedy sinah kan pa nih Hitler cauk cu atu le atu a rel peng, a ihkhun pawng um bizu ah a chiah” tiah a rak ṭial. 

Donald Trump nih Hitler cauk cu Jew miphun Marty Davis nih a ka pekmi a si tiah a chim. Davis nih Vanity Fair sinah “Hitler kong cauk cu ka rak pek ko, sihmanhsehlaw ‘My New Order’ timi cauk a si, Mein Kampf a si lo, a hawi ka si ko nain Jew miphun ka si lo” tiah a chim. 

Donald Trump nih Hitler cauk cu zeitikhmanh ah ka rel bal lo tiah a chim ve. Ms. Brenner nih Trump nih Hitler cauk cu lungzornak a rak ton lioah thazaang laknak dingcaah a rak rel hrimhrim ko lai tiah a chim ve.