Skip to main content

ZAWL TLING LE NGAM BAWM (Part 2)

Zawl Tling thlaan cu an cawh I a dih tikah a ruak cu kan vui lai an vun ti i a ruak zualnak puan an vun remh ah khin a ruak cu a ṭhang ciammam I a ruak zualnak puan nih cun a zo ti lo. Ruakhum vialte cu an khuaruah a har dih i, Ngam Bawm vung au ta u law a ruak hi rak tawng ta seh tiah an vansan hnuah an va auh. Ngam Bawm cu a ra I Zawl Tling ruak pawngah a ṭhu I hitihin ṭahhla a lawh.
                                                               Ka thai zawzawl aw,
                                                               Ka thai zawzawl aw,
                                                               Nang limsiannu ah cang aw la,
                                                               Kei limsianpa ah cang aw ning 
                                                               Kawm kawm khat ah Kan khumh ṭi tawn hna seh law,
Tiah a ṭap I Zawl Tling ruak cu a vun hnamh i a kut in a cul thluahmah. Mah bantuk ṭap hla a lawh i a kut in a vun cul cangka te cun Zawl Tling ruak cu a vung zawr dih I a ruak zualnak puan cun an zual khawh. Ruak a hummi vialte cu an khuaruah a har dih. Mah cangkate cun Ngam Bawm cu Zawl Tling nu le pa nih cun kal zokzok seh, tiah an ṭhawl. Ngam Bawm cu a ṭah pah in an inn ah a kal.
Zawl Tling ruak cu kan vui cang lai, tiah innchung cun an chuahpi I a ruak cu a ṭhang hoi i innka ah aa tlum ti hoi lo. Zei ti tuah awk an hngal lo I, Ngam Bawi cu vun au ṭhan ko u, tiah an ti i an vun auh ṭhan.
Ngam Bawi cu a ngaihchiat bu tein a hung kai ṭhan I Zawl Tling ruak pawngte ah cun a vun ṭhu i, ṭah hla cu hitihin a lawh ṭhan I a ṭap.
                                                                Ka thai zawzawl aw 
                                                                Ka thai zawzawl aw, 
                                                                vokrialnu ah I cang aw la 
                                                                Vaklapa ah cang aw ning,                                                           
                                                                Kawm kawm khat ah 
                                                                kan khumh ṭi tawn hna seh law,
Tiah a ṭap I a ruak cu a vun zun i a muai thluahmah. Mah cangka cun a ruak cu a zawr I innkha cun an chuahpi khawh. Ngam Bawm cu Zawl Tling nu le pa nih cun an ṭhawl hoi i an inn ah a ṭah buin a kal.