Skip to main content

Palik, Immigration Agent Asiloah FBI Nih An In Rat Hnawk Tikah Zei Dah Na Tuah Awk A Si

Palik, Immigration Agent Asiloah FBI Nih An In Rat Hnawk Tikah Zei Dah Na Tuah Awk A Si

1.Kan him nakding caah le miphun sinak le chuahkehnak asiloah biaknak i dan ruang ah thleidannak zei hmanh um lo in buaktlakte in an kan tonghtham nakhnga palik kan i bochan hna. Hi catlap nih palik he ton tikah zulhding le na covo hngalhnak caah theihternak an pek lai. 

 Hi thawngpang hi upadi lei ruahnak cheuhmi caah rinhmi a si lo. 

2. Palik He Nan I Ton TikahNna Covo Hngal

3. NA COVO :

 Bia an in halmi let lo in daite in um khawhnak covo na ngei. Cu na covo cu hman na duh ahcun fiangte in theihter hna. 

Na takpum dah, na mawtaw asiloah na inn chung check lo ding in al khawhnak covo na ngei.  An in tlaih lo ahcun, daite in kal khawhnak covo na ngei. 

An in tlaih ahcun sihni bawmding in covo na ngei. Sihni ka herh tiah hal colh hna. 

Mipem na si zong si lo zong ah asiloah ram mi na si zong si lo zong ah, phunghrampi nih a nenhmi covo pawl na ngei hna. 

NA RIAN:

Daite le tluangte in um.

Palik hnahnawknak pe hlah law an tuahmi kham hna hlah. 

Lih chim hlah law a hmaan lomi ca pe hna hlah. 

Tlaih na si sual tikah nangmah he na chungkhar he timhcia tein um i zuam. 

Palik he nan i ton ning vialte a neknawi tiang cinken i zuam. 

Na covo buarpiak a si tiah na ruah ahcun na umnak hmun ACLU sin ah na lungtlin lonak ca in tial asiloah phone in chawn hna. 

4. BIAHAL DUH AH AN IN FUH TIKAH:

 Daite in um. Tli hlah. Sualnak na ngeih lo asiloah palik nih na covo an buar ko zong ah bia al hna hlah, caal hlah law, kham hna hlah. Palik nih an hmuh khawhnak hmun ah na kut chia.  Kal khawh na si le si lo hal hna. Palik nih na kal kho cang a ti ahcun daite in le thawngpang um lo in kal diam ko. An in tlaih ahcun zei ruang ah dah an in tlaih timi a ruang hngalh khawhnak covo na ngei. 

An biahalmi let lo in daite in um khawhnak covo na ngei i an in halmi na leh duh hna lo ruang ah sual phawt khawh na si lo. An biahlami leh na duh lo ahcun, fiangte in palik cu theihter ko. A cheukhat state hna ah cun, aho na si hngalhnak ding caah na min na chim hrimhrim a herhnak a um ve.   

Na takpum cung le na ngeihchiah thilri chek le kawl nakding caah lungtlinpi lonak nawl na ngei. Asinain na takpum cung ah hriamnam a um tiah paliknih an lungrumh ahcun naa hrukaihmi „a leng in an dah‟ khawh ko. Thazaang in na caal ding a si lo nain cu pinlei kawl le check an duh than ahcun al khawhnak nawl na ngei. Kawl le checkding in na lungtlinpi hna ahcun, a hnu ah biaceih zung ah nangmah kung ah a tlung kho. 

 

5. NA MAWTAW AN DIRTER AHCUN:

A ran khawh chung in a himnak hmun ah na mawtaw cu dirter. Seh that law a chunglei mei vang, thlalang awng hung law na kut pahnih cu mawtaw steering cung ah chia hna. 

An in hal ahcun na driver license, registration le na insurance hmuhsak hna. 

Palik asiloah immigration agent nih na mawtaw chung zohding in an in har ahcun, na al khawh hna. Asinain na mawtaw ah upadi buarnak nehnang a um tiah palik nih an ruah ahcun, na lungtlin lo zong ah an chek khawh ko. 

Mawtaw a mawngtu le a chung ah a thu mi poh biahalmi let lo in daite in um khawhnak nawl an ngei. A mawngtu na si lo ahcun na kal khawh le kal khawh lo na hal khawh. Palik nih na kal kho tiah an in ti ahcun daite in thu ko asiloah daite in kal ko. Palik nih na kal kho lo an in ti hmanh ah an in halmi leh lo in daite in um khawhnak nawl na ngei. 

6. MIPEM NA SINAK DIRHMUN KONG AH BIAHAL NA TON AHCUN :

Palik, immigration agents asiloah a dangdang rian ngeitu hna nih mipem na si le si lo asiloah ram mi sinak a ngei mi na si le si lo kong ah bia an in  halmi leh lo in daite in um khawhnak nawl le cu kong ah anmah he i ceihti lo in na um kho. Khua zei ah dah na chuah, US ram mi na si le si lo kong, asiloah zeitin dah US ah na luh ningcang kong an in halmi leh lo in na um kho ko. (Ramri le vanlawngtual pawl le khuatlawng lamli pawl le chawlehhrawl in khual a tlawng mi caah telhchih in cheukhat mipem lo pawl caah pekmi visa hna caah zulh ding zulhphung sermi an i dang cio.)

US ram mi na si lo i immigration agent nih mipem na sinak ca an in hal tikah na ken ahcun na hmuhsak hrimhrim hna a hau. Kum 18 cung na si cang ahcun mipem na sinak ca na ken zungzal a hau. Mipem na sinak ca na ngeih lo ahcun an biahalmi leh lo in daite in um na duh zia theihter hna. Ram mi na si le si lo dirhmun kong ah lih chim hlah. Cun a dik lomi ca hmuhsak hna hlah.  

 

7. PALIK ASILOAH IMMIGRATION AGENTS PAWL NA INN AN RAT AHCUN :

Palik asiloah immigration agents pawl na inn ah an rat tikah, kawl le chek khawhnak nawl chuahmi ca pawl (warrant) an i ken lo ahcun na inn chung ah luhter hna lonak nawl na ngei. Kawl le chek khawhnak nawl chuahmi ca (warrant) na hliah khawh nakhnga  innka tang a awngmi ah sanhter asiloah thlalangawng in a langhnak hmun ah  hmuhsak ding in palik cu fial hna. Kawl le chek ding in nawl chuahnak ca (warrant) nih palik cu, cu ca chung ah aa telmi hmunhma kawl le checknak nawl a onh hna asinain cu ca chung ah aa telmi hmunhma le thilri lawng an kawl i an chek khawh. Tlaih ding in nawl chuahmi minung cu inn chung ah a um tiah palik nih an ruah ahcun inn chung ah an lut kho. Hmunhma thialternak (removal)/ mah ram ah kuatthannak (ICE) warrant tu cu lungtlinpinak tel lo in inn chung ah luhnak nawl an ngei lo.

Palik nih check le kawlnak ca chuahmi warrant an i ken zong ah an biahalmi let lo in dai tein um khawhnak nawl na ngei. Palik sin ah biachim na duh ahcun, leng ah chuak law innka khar ta. 

 

8. AN IN TLAIH AHCUN :

Sullam ngei lo in an in tlaih tiah na ruah ko zong ah caal lo tein um ko. 

An biahalmi leh lo in dai tein um ka duh timi chim hna law sihni hlanpiak colh ding in hal hna. Solhphelhnak bia chim hlah law le chuanlam kawl hlah. Sihni man na liam khawh lo ahcun, a man pek lo mi sihni hlan khawhnak nawl na ngei. Sihni tel lo in zei bia hmanh chim hlah, zei kong hmanh ah na min thu hlah law nangmah tein biachahnak zong pakhat hmanh tuah hlah. Na umnak khuachung number phone chonh khawhnak nawl na ngei. Sihni na auh ahcun palik nih na chimmi an ngai kho lai lo. 

Tlaih na ton sual ahcun nangmah he na chungkhar he timhcia tein um i zuam. Na chungkhar le na sihni tefetawn nambar chingchiah i zuam. Fa he khua a sa mi asiloah sii-ai in aa thlopbul lio mi na si ahcun lakhruak in thil a cang kho tawnmi caah timhtuahnak ngeicia. Ram mi a si lo mi caah a hlei in ruah awk pawl: 

Upadi buar ruang ah a hung chuah khomi pawl na sihni cu hal asiloah mi pem na sinak dirhmun in azukhannak tuah. 

Mipem na si le si lo cu na sihni dah chim lo a dang aho hmanh theihter hna hlah.

Thonginn chung ah na um lio ah, immigration lei in nawl ngeitu nih an in lenkai khawh men. Sihni he nan i chawnh hlan chung poh cu an biahalmi let hna hlah. Cun zei bantuk kong hmanh ah na min thu hlah. 

Catialmi vialte thate in rel hna. Na lung a fian lo asilole na rel khawh lo ahcun, holhlet ka herh tiah chim hna. 

9. IMMIGRATION HRENNAK HMUN (ICE) AH AN IN CHIAH AHCUN :

Sihni hlannak nawl na ngei, asinain cozah nih na caah sihni an in chiahpiak lai lo. Sihni na ngeih lo ahcun, man lo in asiloah a man a niammi upadi lei riantuanpiaktu hal hna. Na ram tanzunglei palai (consulate) he pehtlaih khawhnak nawl na ngei asiloah an in tlaihmi kong na ram tanzung lei palai thanhding in palik cu fial hna. 

Immigration agent cu a biahalmi let lo in daite in um na duh zia theihter. Na sihni dah ti lo a dang aho sin hmanh ah mipem na si le si lo  chim hna hlah. Sihni he i chonh hmasa lo in mah lungtlin tein mah ram ah kuatnak asiloah na dirhmun sining remhpiakmi tbk. kong ah na min thu hlah. Na min na thut ahcun US ah khuasak ding in naa zuamnak lam a pit kho. 

Mi pem nasinak (“A” nambar) i chingchiah law cucu na chungkhar zong pe hna. Cu nih cun na chungkhar nih na umnak an in kawl khawh lai.  Na zumhmi pakhatkhat sin ah mipem na sinak ca khawpi fimter. 

10. NA COVO BUARPIAK A SI TIAH NA RUAH AHCUN :

Chingchiah ding: Palik nih thil siloning in an tuahmi cu zalam cung ah dohdalh khawh a si lo. Thazang in cal hlah law na lungtlin lonak kong ah taza kan cuai lai tiah tlerh hna hlah. 

Palik i a nambar, a mawtaw nambar, khuazei agency ah a tuan mi dah a si le a dangdang pawl zong a neknawi tiang naa chingchiahmi pohpoh tial hna. Cun mit in a hmutu tette hna pehtlaih khawhnak nambar hal hna. Na hliamkhawn a si ahcun, na hma cu hmanthla hna (sii-ailei in thlopi zuam hmasa). Na lungtlin lonak cu, cu agency's internal affairs division asiloah mipi lungtlinlonak board ah ca in tial. 

Na umnak ACLU chawn hna asiloah www.aclu.org/profiling ah len khawh a si. 

© 2017 ACLU

 

Originally posted by the ACLU at: https://www.aclu.org/know-your-rights/what-do-if-yourestopped-police-immigration-agents-or-fbi

Chin American Association nih zapi caah Hakha holh in kan lehmi a si. Ca a kan lehpiaktu Thawng Lian Cung Thui, Van Hmun Lian, le Siang Lian Sang cungah kan i lawm.

Note: Dallas chinmi ihruainak bu Chin American Association nih "Na Covo thei" timi ACLU nih an tialmi an lehmi a si. Mirang ca cu kan langhter lo. Laica cu an lehning tein kan van tar.

Hmanthlak: Pegitboard News