Skip to main content

ZAWL TLING LE NGAM BAWM (Part 3)

Zawl Tling ruak cu thlan ah an kalpi. Kan vui lai an ti ah khin a ruak cu a thang ṭhan hoi i a thlanka ah aa tlum ti hoi lo. A ti awk an hngal ti lo I Ngam Bawi cu an va auh ṭhan. Ngam Bawm cu thlan ah cun a ngaihchiat bu cun a ra i Zawl Tling ruak cu hitihin a ṭah hla a lawh.                          

                                                               Ka thai zawzawl aw

                                                               ka thai zawzawl aw, 

                                                               Arpinu ah cang aw la,

                                                               Arhlipa ah cang aw ning,

                                                               Chiar chair khat ah 

                                                               kan khumh ṭi tawn hna seh law,

Tiah a ṭap I a ruak cu a vun zun thluahmah. Mah cangka te cun a ruak cu a zawr thliahmah I thlaan chungah cun an vui khawh. Ngam Bawi cu ngaihchiat le lungkuai bu tein an inn leiah cun a kal ṭhan.                                                                                                                                                             

Ngam Bawi nih Zawl Tling thlaan lamah cun pangpar dawhdawh a phun kip a cin. Pangpar hna cu an hung par I thlan cu aa dawh ngaingai. Mithi khua in Zawl Tling nih cun sazawte kha, Vung kal law ka thlan I Ngam Bawi cinmi pangpar dawhdawh khi va ṭawt tuah, tiah a fial. Sazawte nih cun zan fate pangpar cu a va ṭawh I Zawl Tling cu a pek tawn.

Ngam Bawi nih zan fate pangpar aa ṭawh tawn kha a hngalh tikah, Aho nih dah ka pangpar cinmi hi a ṭawh tawn hnga ti hngalh a duh caah zan ah a bawh. Khuamuika thinghmui misapalh caan ah khin sazawte cu a ra I pangpar cu a ṭawh. Ngam Bawi nih cun a zuan hnawh I, kan thah lai. Aho nawl in dah ka pangpar cinmi na ṭawh, tiah a ti i kawngthun aa zah i sawh a zalh, Va ka ṭawhpiak aka ti caah pei ka ṭawh ko cu tiah ati. Sazawte bia kha a theih tikah Ngam Bawm cu aa lawm ngaingai i, Asi ah cun ka thai Zawzawl sinah cun na kalpi kho hnga maw?tiah a ti. Sazawte nih,Kan kal pi khawh ko lai. Asinain lungpang thinphang lakah ka zuang ka kai lai I na ṭih tuk lai caah na kal ngam lai lo tiah a ti. Ngam Bawi nih cun, Ka ṭih hrimhrim lai lo, na zuannak paoh ah ka zuang ve lai ii ,na kai nak paoh ah ka kai ve ko laitiah a ti I sazawte mei cu fek tein aa tleih i a zulh.

An kal lengmang i Zal Tling sin ah cun an va phan. Zawl Tling le Ngam Bawm cu an I hmuh cangka tein an i kup, an i rek i an i hnam i an ṭap. Mithi khua ah cun Ngam Bawm le Zawl Tling cu hnangam tein an um.

Nikhat cu Zawl Tling nih, Kan lo vom nih a ei kan dawi lai, tiah a ti hna. Ramlak an phak in khan an haw. Ngam Bawm hmaiah cun lungsil nupa pahnih an ra I, Ngam Bawi vom nih a seh lai kha,tiah fak piin an au. A pawngkam a zoh lengmang I zeihmanh a hmu lo. Lungsil nupa aa zulmi lawng a hmuh hna i chaikuk in a sawh hna i an thi. Mithi cu Ngam Bawi nih vom a kan kahpiak tiah an i lawn ngaingai. Vahla an thlawrh. Ngam Bawi cu a nih a chuak I, Nan hrut maw zei hen dah?tiah a ti hna.

A hnuah nga kan chuk lai tiah tiva ah an kal ṭhan. Tiva an phak cun hru cu an den. Ruahnah an hung vuan I nga tampi, an ti I an tlaih hna. Ngam Bawi cu  ruahnah kha an phawt ve i nga a si ṭung lo, tiah aa phorh duh lo I a hlonh dih. A paiper tlang ah hnah khat te aa tenhmite he inn ah a tlung. Ngam Bawi cu inn a phak tikah paiper cu Zawl Tling nih a rak cawi i ruahnah cu Nga tiah a lak. Ngam Bawm nih cun Nga a si ṭung lo ruahnah pei asi ko cu tiah ati. Zawl Tling cu a khuaruah a har ngaingai. Cucaah Zawl Tling nih, Ngam Bawm, minung sinah va kir ṭhan law arnak vaa hmanh. Arsa cu va chuan law makphek le khachuan va paih. Kaanphir cungah tahtlem va khang law a tangah saphaw vaa phah law, cu cungah cun va it, tiah a ti.

Ngam Bawi cu minung sinah cun a kir ṭhan I Zawl Tling I bia a chimh bantuk te cun a tuah. Saphaw aa phahmi cungah cun a it. A ih cangka tein arpi pakhat kaanphir cungah cun a hung zuang I tahtlem cu vun lamh. Tahtlem cu a vung tlai I Ngam Bawm cu a thinhmaka ah cun tleng phut in a sawh I a thi colh ve.

Ngam Bawi thlarau cu mithi khua ah cun a vung kal. Zawl Tling nih mithi khua cun a rak don i lunglawm tein an i tong. Mithi khua an cung phak tikah cun lungsil lu kha vom lu in a hmuh ve cang i, Mah vompi nih aho kahmi asi, tiah ati. ruahnah zong cu Nga in a hmuh ve cang.

Zawl Tling le Ngam Bawm cu mithi khua ah cun an I nuam ngai nain sau a um duh loin ṭekbu ruangah an I cang. Cu ṭekbu ruang cu an I ngerh I mi nihh an hmuh tikahhin, Mah hihi ṭekbu ruang taktak asi lo. tiah an ti i nam in an pheh I mei ah an paih. Mei nih cun a kangh i meidip ah a cang. Cuka hmun cu tili chungah cun an i zulkhal lengmang. Cu nga hna cu mi nih an tlaih hna I mei ah an rawh hna. An mit cu a luan ciammam I van ah an kai. Van cu an phan i fitlaw le deirel ah an i cang. Zawl Tling le Ngam Bawm cu atu tiang van ah khin an um ko.

An I duh nak hmual langhternak ah hla phuahtupa nih thutpum hla hitihin a phuah.

Thutpum aw, 

                    “Tluang dang le Tluang dang in 

                    Aan Biak ton har riangmang 

                    Kan mit i ting seh ti kun ci kaw 

                    Van lai arfi tial cuan law.