Skip to main content

Sii-inn chung lungtlinlonak zalong tein langhter khawh a si

Hakha, Chin - Hakha sii-inn a um mi hna nih sii-inn riantuantu hna cung ah siseh, a dangdang ruang ah an lungtlinlo mi a um ahcun zalong tein langhter khawh a si, tiah Social Affairs Zung in thawng kan theih. “Sii-inn riantuan mi hna nih mizaw tha tein zoh, thlopbul le chawnhbiak hi an rian a si. Zeitluk a fim le a thiam zong ah tha tein chawnhbiak kha a rian a si. Sii-inn kong le sii-inn riantantu cung ah a lungtlinglo mi nih thawngzamhca ah siseh, sii-inn he aa pehtlai mi zung ah zalong tein report khawh an si. Kan in cohlan fawn hna,” tiah Social Affairs Minister Pu Pau Lun Min Thang nih The Hakha Post ah a chim.

Sii-inn riantuantu hna kong he pehtlai in Pu Pau Lun Min Thang nih, “Sii-inn a um mi hna a si khawh chung in an lungtlinter le nem tein chawnhbiak ding kha kan i cawnpiak lengmang mi a si. A tam deuh nih cun an i remh cang ko. Aa remh kho rih lo mi pakhat pahnih cu a um ve ko lai. Nan lungtlinlo mi kha zalong tein langhter u, fim kan chimh hna lai i dan kan tat hrimhrim hna lai. Dan kan tat cang mi zong an um. An i remh cuahmah lio a si ko, mizpi nan lung ning in a si rih lo bia zong a si ko lai,” tiah The Hakha Post ah a chimchap.

Hakha sii-inn riantuantu hna kong ah thawngzamhca le khualak chawhvahnak hmun ah aa ceihphai mi an tlawm ti lo. Khuate lei le upa deuh hi a tam deuh cu an si. Cu kong he pehtlai in atu bantuk in Pu Pau Lun Min Thang nih a chim hi a si.

#Hakha Post