Skip to main content

Chinram ah sa kap mi dantat an si cang lai: Chin State Hluttaw Chairman Pu Zo Bawi

Hakha, Chin - Chinram chung ah sa kah le nga bomb puah khap ding le dantat ding cu May 18 -19 Hluttaw Meeting ah dantat ding in biachahnak tuah a si cang tiah Chin Ramkulh Hluttaw Zung in thawng kan theih. “Sa kah hi, cu hmun in kha hmun tiang sa nan kap lai lo tiin hlan zong rak khap lengmang a si ko. Asinain, nan khapnak kulhchung ah kan kah mi a si tung lo tiah buainak a chuak lengmang. Cucaah, tu hnu cun sa pakhat a kah ahcun tangka sing khat, va pakhat a thah ahcun thong sawmnga ti bantuk in dandatatnak kan tuah cang lai. A hmun ri khiah a um ti lai lo. Rap chiah zong kan duh ti lo. Nga bomb puah zong cu thiamthaim a si lai. Ngahring dawi le sur cheh lawnglawng kan onh,” tiah Chin Ramklh Hluttaw Chairman Pu Zo Bawi nih The Hakha Post ah a chim.

Hi kong cu Chin Ramkulh Hluttaw Palai hna nih May 18-19 meeting ah hnatlak cang mi a si i Chin Ramkulh Cozah nih pehzulh in a tak in a tuan ding mi a si. Dantatnak tangka hmuh mi cu khuabawi sin ah pek a si lai i, khuabawi nih khua thanchonak ca ah hman a si lai tiah thawng kan theih.#Hakha Post