Skip to main content

Pyidaungsu Cozah nih KG nih cawn ding mi Laica chuahnak nawl a onh hna lo

Hakha - Hakha, Thantlang, Chinmi tam deuh an umnak Kalay Myo le Gangaw Peng KG siangngakchia nih cawn ding mi Caholh lei lamhruaitu le Tuanbia phunphun aa tial mi ca (Language Guide Book le Big Book) cu Pyidaungsu Cozah nih chuahnak nawl a onh lo tiah CACC Zung in thawng kan theih. “Zeiruang ah dah chuah khawh ding in hnatlak cang ko mi atu sianginn kai a nai tuk cang mi ah chuahnak nawl a kan onh lo mi hi kan lung a faing kho lo. Hi kong ah hin Biahalnak Nganpi kan ngei. Cun, Chin Ramkulh Cozah hrimhrim zong nih a kan tanpi lo, a theih hmanh an thei rua lo tiah ka ruah. Hi cauk chuah nakding ah Tlangcungmi vialte timhcia kan si cang nain chuahnak nawl a kan onh lo mi hi a ruang ka thei kho lo,” tiah CACC Litreture and Publisher Department Director Pastor Lai Cung nih The Hakha Post ah a chim.

    Hi bantuk in mahle miphun caholh tuah cio ding in aa timtuah mi Tlangcungmi dihlak hi 65 renglo an si. Chinca chuah ding ah timhtuah mi ca dangdang hna cu chuahnak nawl pek le chuahpiak a si cang. Asinain, Pyiduangsu Cozah nih chuahnak nawl a pek lo mi hi a biapi bik tiah ruah mi cauk pahnih a si tiah theih a si. “Hi bantuk in KG nih cawn ding in Chinca le miphun dangdang nih kan chuah mi hi an thiam khawh ding le an hngalh khawh ding te khin tuah a si. Mah bantuk cun Kawl ca zong tuah ding in hnatlaknak ngeih a si. Anmah Kawl ca cu an chuah cang nain Tlangcungmi ca tu cu nihin tiang chuahnak nawl an kan pe rih lo. Zeiruang ah dah ti mi biahalnak nganpi kan ngei ko,” tiah Pastor Lai Cung nih a chimchap. Hi Chinca tuah ding le chuah ding mi hi CACC, UNICEF, MBC le Chin Ramkulh Cozah hnatlaktinak in timhtuah mi a si. KG cawn ding mi Chinca chuah ding a dangdang hna cu chuah a si cang nain a biapi mi cauk pahnih tu cu chuahnak nawl nihin tiang onh a si rih lo.

[Hakha Post]