Skip to main content

KG siangngakchia nih sianginn cacawn caan ah Chinca an cawn mi cu kau deuh in an cawn cang lai

Hakha - KG siangngakchia nih CACC chuahpiak mi Chinca sianginn cacawn caan ah an cawn mi cu kau deuh in an cawn cang lai tiah thawng kan theih. “CACC nih chuahpiak mi Chinca hi KG nih sianginn ca cawn caan ah an rak cawn. Tukum zong kau deuh le tha deuh in cawnpiak le chimh an si lai. Asinain, tang 1,2 le 3 tu nih cun sianginn cacawn caan ah si lo in sianginn leng ah cawn a si lai,” tiah Chin Ramkulh Fimcawnnak Zung raintuan mi Pu Lian Cung nih The Hakha Post ah a chim.

   KG le tang 1,2, le 3 nih Chinca cawn ding ningcang mizapi nih cawh le fonh a si lengmang mi kong ah CACC ah Ca lei tawlreltu Pastor Lai Cung nih, “Laica cawn ding hi KG nih cun ngakchia nih cawn ding a si mi le a dangdang ngakchia an lung nuamh nakding in tuah mi ca kha an cawn. Hihi Cozah he lungtlinnak kan ngeih mi a si. Asinain, tang 1,2 le 3 nih sianginn ca cawn caan ah si lo in a leng in an cawn lai i Chinca ah a sang deuh mi Chin Carel ti mi an cawn,” tiah a fianternak cu The Hakha Post ah a chim. Hi Chinca a chimtu hna hi Cozah siangcachim lawng siloin a lenglei in Chinca chimtu laakpiak in an chimh hna i thlahlawh zong pek an si tiah thawng kan theih.[Hakha Post]

Hmanthlak: Getty Images